يزرايل اسكەرىنىڭ شابۋىلدارى سالدارىنان گازا سەكتورىندا قازا تاپقاندار سانى 72 549 ادامعا جەتتى، دەپ حابارلايدى "ادىرنا" ۇلتتىق پورتالى.
بۇل تۋرالى گازا دەنساۋلىق ساقتاۋ مينيسترلىگى مالىمدەدى.
ۆەدومستۆونىڭ سوڭعى دەرەكتەرىنە سايكەس، سوڭعى 48 ساعات ىشىندە اۋرۋحانالارعا 8 ادامنىڭ ءمايىتى جەتكىزىلگەن. ونىڭ ءبىرى ءۇيىندى استىنان شىعارىلعان. سونىمەن قاتار 24 ادام جاراقات العان.
رەسمي مالىمەت بويىنشا، 2025 جىلدىڭ 10 قازاندا ەنگىزىلگەن اتىستى توقتاتۋ رەجيمىنەن بەرى يزرايل شابۋىلدارىنىڭ سالدارىنان 773 ادام قازا تاۋىپ، 2 171 ادام جارالانعان. بۇدان بولەك، 761 ادامنىڭ دەنەسى قيراندىلار استىنان تابىلعان. ءساۋىر ايىنىڭ باسىنان بەرى سوت-مەديتسينالىق ساراپتاما ناتيجەسىندە تاعى 196 ادامنىڭ قازا تاپقانى راستالىپ، جالپى ستاتيستيكاعا ەنگىزىلگەن.
وسىلايشا، 2023 جىلدىڭ قازان ايىنان بەرى قازا تاپقاندار سانى 72 549-عا جەتسە، جارالانعاندار سانى 172 274 ادامدى قۇراپ وتىر. مالىمەتكە سايكەس، گازا سەكتورىنداعى قيراعان عيماراتتاردىڭ استىندا ءالى دە مىڭداعان ادامنىڭ دەنەسى قالۋى مۇمكىن. ايماقتاعى گۋمانيتارلىق جاعداي كۇردەلى كۇيىندە قالىپ وتىر.
