سولتۇستىك قازاقستان وبلىسىندا 30 جىلدان استام ۋاقىت قۇجاتسىز ءومىر سۇرگەن ازاماتقا جەكە كۋالىك بەرىلدى، دەپ حابارلايدى "ادىرنا" ۇلتتىق پورتالى Almaty.tv-عا سىلتەپ.
58 جاستاعى قىزىلجار اۋدانىنىڭ تۇرعىنى سەرگەي پوريادكين تولقۇجاتىن 1990 جىلداردىڭ باسىندا جوعالتىپ العان.
سودان بەرى ءتۇرلى سەبەپتەرمەن قۇجاتتارىن قايتا راسىمدەي الماي، ەل ىشىندە ءبىر وڭىردەن ەكىنشىسىنە كوشىپ جۇرگەن. وسى ۋاقىت ارالىعىندا ول مەديتسينالىق قىزمەتتەرگە قول جەتكىزە الماي، تەك جالدامالى جۇمىستارمەن كۇنەلتكەن.
ۋچاسكەلىك ينسپەكتور مەن كوشى-قون قىزمەتى ماماندارىنىڭ كومەگىمەن جەكە دەرەكتەرى قالپىنا كەلتىرىلىپ، وعان رەسمي تۇردە جەكە كۋالىك راسىمدەلدى.
سەرگەي پوريادكيننىڭ ايتۋىنشا، قۇجات جوعالتقاننان كەيىن ونى قالپىنا كەلتىرۋ ءتۇرلى تۇرمىستىق جاعدايلارعا بايلانىستى كەيىنگە شەگەرىلىپ كەلگەن.
ال سقو پوليتسيا دەپارتامەنتى كوشى-قون قىزمەتى باسقارماسىنىڭ وكىلدەرى وڭىردە قۇجاتسىز جۇرگەن ازاماتتاردىڭ قۇقىقتىق مارتەبەسىن انىقتاۋ جانە قۇجاتتاندىرۋ جۇمىستارى جالعاسىپ جاتقانىن مالىمدەدى.
