گرۋزيادادا ەسىرتكىنى زاڭسىز ساتىپ الدى، ساقتادى جانە ءىرى ءارى اسا ءىرى كولەمدە ساۋدالادى دەگەن كۇدىكپەن ەكى شەتەلدىك، ياعني قازاقستان مەن ۋكراينا ازاماتى ۇستالدى. بۇل تۋرالى ەلدىڭ ىشكى ىستەر مينيسترلىگى 25 ءساۋىر كۇنى مالىمدەدى، دەپ حابارلايدى "ادىرنا".
كۇدىكتىلەر – 2008 جىلى تۋعان جىگىت پەن قىز. ولار ءارتۇرلى ۋاقىتتا ۇستالعان.
“تەرگەۋ ولاردىڭ اسا ءىرى كولەمدەگى مەتادوندى زاڭسىز ساقتاپ، ساتۋعا قاتىسى بار ەكەنىن انىقتادى”، – دەپ مالىمدەدى گرۋزيانىڭ ىشكى ىستەر مينيسترلىگى.
ەسىرتكى زاتتارى كۇدىكتىلەردىڭ ۋاقىتشا تۇرىپ جاتقان جەرىن ءتىنتۋ كەزىندە تابىلىپ، تاركىلەندى. سونىمەن قاتار تەرگەۋ ەكسپەريمەنتى بارىسىندا كۇدىكتىلەر مەتادوندى وتكىزۋ ءۇشىن دايىنداعان جاسىرىن ورىنداردى كورسەتتى.
گرۋزيا ىشكى ىستەر مينيسترلىگى كۇدىكتىلەردى ۇستاۋ ءساتى كورسەتىلگەن ۆيدەو جاريالادى.
پوليتسيا باسقا زاتتاي ايعاقتارمەن بىرگە ەسىرتكىنى ولشەپ، وراۋعا ارنالعان ماتەريالداردى دا تاركىلەگەن.
“اتالعان ءىس بويىنشا گرۋزيا قىلمىستىق كودەكسىنىڭ 260 جانە 260 (4) باپتارى بويىنشا قىلمىستىق ءىس قوزعالعان. بۇل باپتار 20 جىلعا دەيىن باس بوستاندىعىنان ايىرۋدى نەمەسە ءومىر بويىنا باس بوستاندىعىنان ايىرۋ جازاسىن قاراستىرادى”، – دەپ مالىمدەدى ۆەدومسۆتو.
