جامبىل وبلىسىنىڭ بۇرىنعى اكىمى امالبەك تشانوۆتىڭ ءىنىسى جامالبەك بەكداۋلەت حالىقارالىق ەسىرتكى ترافيگىن ۇيىمداستىرۋ كۇدىگىمەن ۇستالدى، دەپ حابارلايدى "ادىرنا" ۇلتتىق پورتالى.
تەرگەۋ مالىمەتىنشە، 2025 جىلدىڭ 8 قىركۇيەگىندە الماتىداعى «جەتىسۋ» كەدەن بەكەتىندە تايلاندتان كەلگەن پوشتا سالەمدەمەسى تەكسەرىلگەن. تەكسەرۋ بارىسىندا ەرەكشە ءيىسى بار سۇيىق زات انىقتالىپ، ساراپتاما ناتيجەسىندە ونىڭ كاننابيس ەكستراكتى – گاشيش مايى ەكەنى بەلگىلى بولعان.
قۇقىق قورعاۋ ورگاندارىنىڭ نۇسقاسىنا سايكەس، جامالبەك بەكداۋلەت ەسىرتكىنى حالىقارالىق پوشتا ارقىلى جەتكىزۋدى ۇيىمداستىرعان. ول بۇل ارەكەتتەردى جۇزەگە اسىرۋ ءۇشىن دەلدالداردى جانە قىلمىستىق ماقساتتان بەيحابار ءۇشىنشى تۇلعالاردى پايدالانعان بولۋى مۇمكىن.
كۇدىكتى ۇستالىپ، سوت سانكتسياسىمەن قاماۋعا الىندى. وعان كونتراباندا جانە ەسىرتكى اينالىمىنا قاتىستى ايىپتار تاعۋ جوسپارلانىپ وتىر.
امالبەك تشانوۆ – قوعام قايراتكەرى، شىمكەنت (1992–1993) پەن جامبىل وبلىسىنىڭ اكىمى (1995–1998), مينيستر جانە پارلامەنت دەپۋتاتى قىزمەتتەرىن اتقارعان بەلگىلى مەملەكەت قايراتكەرى.
