شاحماتتان ءۇش دۇركىن الەم چەمپيونى ءبيبىسارا اساۋباەۆانىڭ اناسى ليانا تاڭجارىقوۆا قىزىنا بولىنەتىن قارجى كولەمىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
بۇعان دەيىن سپورتشىعا سوڭعى 4 جىلدا ەلدىڭ شاحمات فەدەراتسياسىنان 388 ملن تەڭگە بولىنگەنى تۋرالى اقپارات تاراعان ەدى.
«سوڭعى 4 جىلدا بيبىساراعا 847 مىڭ دوللار ءبولىندى دەپ ايتىلىپ جاتىر. بۇل — گرانتتار مەن سىياقىلار. ءبيبىسارا فەدەراتسيادان جالاقى المايدى. جالپى سوما - 388 ملن تەڭگە. ونىڭ 315 ميلليونى - گرانتتار، 73 ميلليونى - سىياقىلار. الايدا گرانتتار بىزگە بەرىلمەيدى. ولار جاتتىقتىرۋشىلارعا فەدەراتسيا ارقىلى تىكەلەي تولەنەدى. بۇل قاراجات سالىق شەگەرىلگەننەن كەيىن تولەنەدى»، - دەدى ول.
تاڭجارىقوۆا سالىقتان كەيىن ءتورت جىلدا گرانتتار كولەمى 220 ميلليون تەڭگەنى، ال سىياقىلار 58 ميلليون تەڭگەنى قۇراعانىن اتاپ ءوتتى. وسىلايشا، قولعا تيگەن جالپى سوما 278 ميلليون تەڭگە بولعان.
ء«تورت جىل ىشىندە جاتتىقتىرۋشىلارعا شامامەن 465 مىڭ دوللار تولەنگەن. ال سىياقى كولەمى - 122 مىڭ دوللار. بىزدە تۇراقتى جالاقى جوق، تەك جەڭىسكە جەتكەن جاعدايدا عانا سىياقى بەرىلەدى»،–دەدى سپورتشىنىڭ اناسى.
ول فەدەراتسيانىڭ جالپى بيۋدجەتى قالاي بولىنەتىنىن سۇرادى. ايتۋىنشا، شاحمات ۇيىمىنىڭ جىلدىق قارجىلاندىرۋى شامامەن 10 ملن دوللاردى قۇرايدى.
«فەدەراتسيا 4 جىلدا بولىنگەن 30 ملن دوللاردى قايدا جۇمسادى؟ فەدەراتسياعا قويار سۇراعىم وسى. جاۋاپ كۇتەمىن»، — دەدى تاڭجارىقوۆا ۆيدەوۇندەۋىندە.
قازاقستان شاحمات فەدەراتسياسى ءبيبىسارا اساۋباەۆانىڭ قارجىلاندىرىلۋىنا قاتىستى داۋ تۋىنداعاننان كەيىن پىكىر ءبىلدىردى. ۇيىم وكىلدەرى شاحماتشى ۇلتتىق قۇرامانىڭ بارلىق مۇشەسىنىڭ ىشىندە ەڭ ۇلكەن قولداۋعا يە ەكەنىن جەتكىزدى.
فەدەراتسيا مالىمەتىنشە، بۇگىندە قازاقستانداعى شاحمات تەك كاسىبي سپورت قانا ەمەس، ەل بويىنشا ونداعان مىڭ ادامدى قامتيتىن اۋقىمدى جۇيەگە اينالعان. وعان بالالار مەن جاسوسپىرىمدەر باعىتى، ۇلتتىق قۇرامالاردى دامىتۋ، ينفراقۇرىلىم جانە جاتتىقتىرۋشىلار كورپۋسى كىرەدى.
«قازاقستانداعى شاحمات — ونداعان مىڭ بالا، اتا-انا، جاتتىقتىرۋشى جانە كاسىبي ويىنشىلاردى بىرىكتىرەتىن ءىرى رەسپۋبليكالىق ەكوجۇيە»، — دەپ مالىمدەدى فەدەراتسيادا.
سوڭعى ەكى جىلدا ەلدە شاحمات بەلسەندىلىگى ايتارلىقتاي ارتقان. 2023 جىلى شامامەن 1,5 مىڭ تۋرنير وتكىزىلسە، 2025 جىلعا قاراي ولاردىڭ سانى 3,8 مىڭنان اسقان. 2025 جىلدىڭ قورىتىندىسى بويىنشا قازاقستاندىق شاحماتشىلار حالىقارالىق تۋرنيرلەردە 162 مەدال جەڭىپ العان، ونىڭ 64-ءى — التىن. فەدەراتسيا بۇل تاۋەلسىزدىك جىلدارىنداعى ەڭ ۇزدىك ناتيجە ەكەنىن اتاپ ءوتتى.
فەدەراتسيا دەرەگىنە سايكەس، 2023–2026 جىلدارى ءبيبىسارا اساۋباەۆاعا شامامەن 388 ملن تەڭگە باعىتتالعان.
«سپورتشىلاردىڭ ىشىندە ەڭ ۇلكەن قارجىلىق قولداۋدى ءبيبىسارا اساۋباەۆا الادى. 2023–2026 جىلدارداعى جيىنتىق كولەم شامامەن 388 ملن تەڭگەنى قۇرايدى»، — دەپ حابارلادى ۇيىم.
بۇل سوماعا گرانتتار مەن ناقتى سپورتتىق جەتىستىكتەر ءۇشىن بەرىلگەن سىياقىلار كىرەدى. مىسالى، 2023 جىلى 95 ملن تەڭگە گرانت جانە 28 ملن تەڭگە سىياقى تولەنگەن. كەيىنگى جىلدارى دا قارجىلاندىرۋ جوعارى دەڭگەيدە ساقتالعان.
فەدەراتسيانىڭ مالىمەتىنشە، بۇل قولداۋ ۇلتتىق قۇرامانىڭ باسقا جەتەكشى ويىنشىلارىنا بولىنەتىن قارجىدان ورتا ەسەپپەن 3–5 ەسە كوپ.
2026 جىلى قولداۋ كولەمى ۇلعايعان. جالپى سوما 105 ملن تەڭگەنى قۇراعان، ونىڭ 80 ملنى – «التىن پاكەت» پەن فەدەراتسيا پرەزيدەنتىنىڭ گرانتى. بۇعان قوسا، بليتس بويىنشا الەم چەمپيوناتىنداعى جەڭىسى ءۇشىن شاحماتشىعا 25 ملن تەڭگە، ال جاتتىقتىرۋشىسىنا 10 ملن تەڭگە تولەنگەن.
فەدەراتسيادا سونداي-اق اساۋباەۆانىڭ تەك فەدەراتسيادان عانا ەمەس، باسقا ۇيىمداردان دا قولداۋ الاتىنى ايتىلدى.
«سپورتشى باسقا كوزدەردەن، سونىڭ ىشىندە Sport Qory قورىنان تۇراقتى تۇردە دەمەۋشىلىك كومەك الادى»، — دەلىنگەن تۇسىندىرمەدە.
سىنعا جاۋاپ رەتىندە فەدەراتسيا شاحماتتى قارجىلاندىرۋ ءبىر كوزدەن جۇرگىزىلەتىنىن جانە قاراجات كوپتەگەن باعىتقا، اتاپ ايتساق، سپورتشىلاردى دايىنداۋدان باستاپ حالىقارالىق تۋرنيرلەر وتكىزۋگە دەيىن بولىنەتىنىن اتاپ ءوتتى.
«فەدەراتسيانىڭ جىلدىق بيۋدجەتى 5 ملرد تەڭگەدەن اسادى. قارجىلاندىرۋ Freedom Holding Corp.كومپانياسىنان جۇزەگە اسىرىلادى»، — دەپ حابارلادى ۇيىم.
ايتا كەتەيىك، قازىرگى ۋاقىتتا قازاقستان شاحمات فەدەراتسياسىن كاسىپكەر تيمۋر تۋرلوۆباسقارادى. Forbes مالىمەتىنشە، ونىڭ بايلىعى 6,3 ميلليارد دوللاردى قۇرايدى جانە ول قازاقستانداعى ەڭ باي ازاماتتار تىزىمىندە ەكىنشى ورىندا تۇر.
