29 ساۋىردە الماتى قالاسىندا قازاق سپورت جانە تۋريزم اكادەمياسىنىڭ بازاسىندا جاڭا «Sport Consulting Forum» قوعامدىق بىرلەستىگىنىڭ قۇرىلتاي كونفەرەنتسياسى مەن تۇساۋكەسەرى ءوتتى، دەپ حابارلايدى «ادىرنا» ءتىلشىسى.
ءىس-شاراعا مەملەكەتتىك ورگان وكىلدەرى، سپورت ۇيىمدارى، سونداي-اق قازاقستاننىڭ داڭقتى سپورتشىلارى – وليمپيادا ويىندارى مەن الەم چەمپيوناتتارىنىڭ جەڭىمپازدارى جانە جۇلدەگەرلەرى قاتىستى. ولاردىڭ قاتارىندا سپورتتىق گيمناستيكادان بەس دۇركىن وليمپيادا چەمپيونى نەللي كيم، شاڭعى جارىسىنان وليمپيادا چەمپيونى ۆلاديمير سميرنوۆ، فۋتبولدان وليمپيادا چەمپيونى ەۆگەني ياروۆەنكو، اۋىر اتلەتيكادان الەمنىڭ ءتورت دۇركىن چەمپيونى يليا يلين، وليمپيادا ويىندارىنىڭ كۇمىس جۇلدەگەرى يسلام بايرامۋكوۆ، گرەك-ريم كۇرەسىنەن وليمپيادا ويىندارىنىڭ كۇمىس جۇلدەگەرى دەمەۋ جادىراەۆ بولدى.
كونفەرەنتسيا بارىسىندا سپورتشىلاردى دايارلاۋدىڭ جاڭا مودەلى قالىپتاساتىنى ايتىلدى. ستراتەگيالىق ماقسات رەتىندە 2044 جىلعا قاراي، ياعني قازاق سپورت جانە تۋريزم اكادەمياسىنىڭ 100 جىلدىق مەرەيتويىنا وراي، قازاقستاندا الەمدىك جەتەكشى ورتالىقتارمەن باسەكەلەسە الاتىن زاماناۋي ءبىلىم بەرۋ جانە سپورتتىق عىلىمي بازا قۇرۋ مىندەتى قويىلىپ وتىر. جيىن سوڭىندا تانىمال سپورتشىلار اكادەميا ستۋدەنتتەرىمەن جۇزدەسىپ، تاجىريبەلەرىمەن ءبولىستى.
ايتا كەتەيىك، جاڭا ۇيىم تاۋەلسىز ساراپتامالىق عىلىمي-ادىستەمەلىك الاڭ رەتىندە قۇرىلدى. ول تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراتسيالارى سياقتى مەملەكەتتىك ورگانداردىڭ فۋنكتسيالارىن الماستىرمايدى. بىرلەستىكتىڭ نەگىزگى ميسسياسى — بالالار اراسىنداعى سپورتتىق تالانتتاردى ەرتە انىقتاۋ، ولاردىڭ دامۋىن عىلىمي تۇرعىدا سۇيەمەلدەۋ جانە زاماناۋي عىلىمي جەتىستىكتەردى قولدانا وتىرىپ، وليمپيادا تۇعىرىنا دەيىن جەتكىزۋ.
فوتو: Informburo.kz
