اتىراۋ قالاسى مەن وعان ىرگەلەس ەلدى مەكەندەردى قويۋ ءتۇتىن باستى. «اقجايىق» مەملەكەتتىك تابيعي رەزەرۆاتىنداعى قامىس جانىپ جاتىر. ءورت وشاعى قالادان 35 شاقىرىم جەردە، كاسپي تەڭىزىنە قارايتىن باعىتتا ورنالاسقان. بۇل تۋرالى وبلىستىق توتەنشە جاعدايلار دەپارتامەنتى مالىمدەدى، دەپ حابارلايدى "ادىرنا".
ءورتتىڭ جالپى اۋماعى 12 گەكتار. قازىرگى تاڭدا جانىپ جاتقان اۋماق 8 گەكتار، ال سوندىرىلگەن اۋماق 4 گەكتار.
ءتىلسىز جاۋمەن كۇرەسكە توتەنشە جاعدايلار دەپارتامەنتىنىڭ 65 مامانى مەن 18 بىرلىك تەحنيكاسى جۇمىلدىرىلدى. الايدا، ءورت ءسوندىرۋ جۇمىستارىن جەر بەدەرىنىڭ ەرەكشەلىگى قيىنداتىپ وتىر.
«ورتەنىپ جاتقان اۋماق — باتپاقتى جەر. سونىڭ سالدارىنان ارنايى تەحنيكانىڭ ءوتۋى مۇمكىن ەمەس. قازىرگى ۋاقىتتا ءورت سوندىرۋشىلەر قورعانىس جولاقتارىن سالىپ، وتتى قولمەن سوندىرۋگە ءماجبۇر»، — دەپ حابارلادى مەكەمە وكىلدەرى.
مامانداردىڭ ايتۋىنشا، قازىرگى ۋاقىتتا ەلدى مەكەندەرگە ەشقانداي قاۋىپ ءتونىپ تۇرعان جوق.
