موڭعوليا پرەمەر-ءمينيسترى نيام-وسورىن ۋچرال جۋرناليستەردى دۇنيەجۇزىلىك ءباسپاسوز بوستاندىعى كۇنىمەن قۇتتىقتادى، دەپ حابارلايدى «ادىرنا» ءتىلشىسى «مونتسامەگە» سىلتەمە جاساپ.
«ۇكىمەت اتىنان جانە جەكە ءوز اتىمنان قوعامدى شىنايى ءارى دەرەكتەرگە نەگىزدەلگەن اقپاراتپەن قامتاماسىز ەتىپ وتىرعان سىزدەردى، جۋرناليستەردى، دۇنيەجۇزىلىك ءباسپاسوز بوستاندىعى كۇنىمەن قۇتتىقتايمىن. پىكىر ءبىلدىرۋ ەركىندىگى – دەموكراتيانىڭ نەگىزى. ۇكىمەت ۇسىنعان “ازات ەتەمىز” باستاماسى ازاماتتاردى بيۋروكراتيادان، قىسىم مەن جەمقورلىقتان بوساتۋعا باعىتتالعان. بۇل جۇمىستىڭ ناتيجەلەرى حالىققا قانشالىقتى وبەكتيۆتى ءارى تىكەلەي جەتكىزىلەتىنى كوپ جاعدايدا جۋرناليستيكا ەركىندىگىنىڭ دەڭگەيىنە بايلانىستى»،-دەدى ول.
ۇكىمەت باسشىسى ءسوز بوستاندىعىن قورعاپ كەلە جاتقانىن اتاپ ءوتتى.
«موڭعوليانىڭ ءباسپاسوز بوستاندىعى يندەكسىندەگى 17-ورنى وڭ ديناميكانى كورسەتەدى. مەن ازاماتتار مەن جۋرناليستەردىڭ پىكىر ءبىلدىرۋ ەركىندىگىن جۇيەلى تۇردە قورعاپ كەلەمىن، سونىڭ ىشىندە قىلمىستىق كودەكستىڭ 13.14-بابىنىڭ كونستيتۋتسيا قاعيداتتارىنا سايكەس كەلمەيتىنىن اتاپ وتەمىن. ءبىزدىڭ ورتاق ماقساتىمىز – قانداي دا ءبىر قىسىمدى جوققا شىعاراتىن قۇقىقتىق ورتادا جۋرناليستيكانىڭ ەركىن ءارى تاۋەلسىز قىزمەت ەتۋىنە جاعداي جاساۋ. ءسوز بوستاندىعى مەن جۋرناليستيكانىڭ پرينتسيپشىلدىگى شىندىقتىڭ ورنىعۋىنا جانە دەموكراتيالىق ينستيتۋتتاردىڭ نىعايۋىنا ىقپال ەتەدى»،-دەپ تولىقتىردى باسشى.
جولداۋدىڭ سوڭىندا پرەمەر-مينيستر جۋرناليستەردى دۇنيەجۇزىلىك ءباسپاسوز بوستاندىعى كۇنىمەن تاعى دا قۇتتىقتادى.
