سولتۇستىك قازاقستان وبلىسىندا كامەلەتكە تولماعانداردىڭ تەرەزەدەن قۇلاۋ دەرەكتەرى الاڭداۋشىلىق تۋدىرىپ وتىر. وبلىستىق توتەنشە جاعدايلار دەپارتامەنتى باسقارماسىنىڭ باستىعى اسەت شايكيننىڭ مالىمەتىنشە، سوڭعى وقيعا 25 ءساۋىر كۇنى پەتروپاۆل قالاسىنداعى «كاشتان» ساياجاي قوعامىندا بولعان، دەپ حابارلايدى "ادىرنا".
11 جاسار قىز ءۇش قاباتتى ءۇيدىڭ ەكىنشى قاباتىنداعى تەرەزەدەن قۇلاپ تۇسكەن. جاراقاتتانعان ءجاسوسپىرىم وبلىستىق كوپبەيىندى بالالار اۋرۋحاناسىنا جاتقىزىلدى.
"ستاتيستيكاعا سۇيەنسەك، مۇنداي وقيعالاردىڭ شامامەن 90% 2-5 جاسقا دەيىنگى بالالار زارداپ شەگەدى. بۇل جاستا بالالار قورشاعان ورتاعا قىزىعۋشىلىعى جوعارى، تانىپ-بىلگىسى كەلەدى، ال قاۋىپ سەزىمى ءالى تولىق قالىپتاسپاعان. ەرەسەكتەردىڭ قاراۋىنسىز قالعان بالا تەرەزە جاقتاۋىنا شىعىپ، موسكيت تورىنا سۇيەنۋى مۇمكىن. مۇنداي جاعدايدا تور سالماققا شىداماي، بالا ونىمەن بىرگە تومەنگە قۇلاپ كەتەدى", - دەيدى اسەت شايكين.
وسىعان بايلانىستى توتەنشە جاعدايلار دەپارتامەنتى پوليتسيا، ءبىلىم بەرۋ ۇيىمدارى جانە ەرىكتىلەرمەن بىرلەسىپ الدىن الۋ شارالارىن جۇرگىزىپ جاتىر. مەكتەپتەر مەن بالاباقشالاردا، اتا-انالار جينالىستارىندا تۇرمىستىق قاۋىپسىزدىك ەرەجەلەرى ءتۇسىندىرىلىپ، كوپقاباتتى ۇيلەردىڭ اۋلالارىندا تۇرعىندارمەن كەزدەسۋلەر ۇيىمداستىرىلعان.
"بالالاردىڭ تەرەزەدەن قۇلاپ كەتۋىنىڭ الدىن الۋ ءۇشىن بالانى ەشقاشان قاراۋسىز قالدىرماڭىز. تەرەزە ماڭىنا جيھاز قويماڭىز. ۇيدە بالا بولسا، تەرەزەنى اشىق قالدىرماعان ءجون. قازىرگى ۋاقىتتا تەرەزەلەرگە ارنالعان بەكىتكىشتەر، بلوكيراتورلار، قاۋىپسىزدىك قۇلىپتارى بار. ال اتا-انا مىندەتتەرىن دۇرىس ورىنداماۋ جاۋاپكەرشىلىككە اكەلەدى", - دەيدى باسقارما باستىعى.
مامانداردىڭ ايتۋىنشا، ءۇش جاعدايدا دا كامەلەتكە تولماعانداردىڭ تەرەزەدەن قۇلاۋىنا بايلانىستى اتا-انالارىنا قاراۋسىز قالدىرعانى ءۇشىن قر اكىمشىلىك كودەكستىڭ 127-بابى بويىنشا حاتتاما تولتىرىلدى.
