پرەزيدەنت قاسىم-جومارت توقاەۆ ۇكىمەتكە تسيفرلىق ەكونوميكانىڭ ىشكى جالپى ونىمگە اسەرىن باعالاۋ بويىنشا ۇسىنىستار ەنگىزۋدى تاپسىردى. بۇل تۋرالى پرەزيدەنت الماتىدا وتكەن جاساندى ينتەللەكتىنى دامىتۋ جونىندەگى كەڭەستىڭ ەكىنشى وتىرىسىندا ايتتى، دەپ حابارلايدى "ادىرنا".
توقاەۆتىڭ پايىمداۋىنشا، جاڭا تەحنولوگيالىق پاراديگماعا كوشۋ ءۇشىن قازىرگى جاعدايعا وبەكتيۆتى، شىنايى باعا بەرۋ قاجەت.
«تسيفرلىق ەكونوميكا تۋرالى تۇجىرىمداما ءالى تولىق جاساقتالماعان، قولدانىستاعى ادىستەمە ءبىر ىزگە تۇسپەگەن. ىشكى جالپى ءونىمدى 5 پايىزعا جەتكىزۋ تۋرالى ايتقاندا، ناقتى ەكونوميكا سەكتورىنداعى ءوسىم مەن يننوۆاتسيا ناتيجەسىندەگى تابىستىڭ ارا جىگىن اجىراتا ءبىلۋ كەرەك. جالپىلاما كورسەتكىشتەر كوبىنە جۇمىستىڭ تيىمدىلىگىن ەمەس، الدامشى كورىنىس قالىپتاستىرىپ جاتادى. سوندىقتان بۇل تسيفرلاندىرۋ مەن جاساندى ينتەللەكتىنىڭ ەل ەكونوميكاسىنا قوسقان ناقتى ۇلەسىن باعالاۋعا مۇمكىندىك بەرمەيدى. ۇكىمەت ستراتەگيالىق جوسپارلاۋ جانە رەفورمالار اگەنتتىگىمەن بىرلەسىپ، تسيفرلىق ەكونوميكانىڭ ءىجو-گە اسەرىن باعالاۋ بويىنشا ۇسىنىستار ەنگىزگەنى ءجون»، – دەدى مەملەكەت باسشىسى.
پرەزيدەنت بىرىككەن اراب امىرلىكتەرى قولما-قول تولەمسىز ەكونوميكاعا كوشۋدى جوسپارلاپ وتىرعانىن مىسالعا كەلتىرىپ، ەكونوميكانى تسيفرلاندىرۋ زامان تالابى ەكەنىن ايتتى.
قىتايدان دا ۇلگى الۋعا بولادى. كورشىلەس ەل جىل سايىنعى تريلليون دوللار ترانزاكتسيالاردى تسيفرلىق پلاتفورمادا وڭدەۋ ءىسىن جولعا قويدى.
«قازاقستان دا بۇل باعىتتا وڭ ناتيجەگە قول جەتكىزدى: ەلىمىزدەگى قولما-قول اقشاسىز تولەمدەردىڭ ۇلەسى 80 پايىزدان استى. وسى جيىنعا قاتىسىپ وتىرعان وتاندىق فين-تەح كومپانيالار كاسىبي دەڭگەيلەرى جوعارى ەكەنىن كورسەتتى. تسيفرلىق تەڭگەنى كەڭىنەن قولدانۋ شىن مانىندە «ويىن ەرەجەسىن» وزگەرتەدى. ويتكەنى بيۋدجەتتىڭ اشىقتىعىن قامتاماسىز ەتىپ، ترانزاكتسيا ءۇشىن الىناتىن كوميسسيالىق تولەمدەردىڭ شىعىنىن قىسقارتادى. بۇل قازاقستاننىڭ دۇنيە جۇزىنەن كوبىرەك كاپيتال تارتىپ، جەتەكشى ينۆەستيتسيالىق جانە قارجىلىق ورتالىققا اينالۋىنا كومەكتەسۋگە ءتيىس»، – دەدى قاسىم-جومارت توقاەۆ.
بىلتىر ەلىمىزدە العاش رەت تسيفرلىق اكتيۆتەر مەن كريپتوۆاليۋتانى رەتتەيتىن قۇقىقتىق بازا قالىپتاستى. جىلجىمايتىن مۇلىكتى، التىندى، ءىرى ءوندىرىس كاسىپورىندارىنىڭ اكتسيالارىن جانە باسقا دا اكتيۆتەردى توكەنيزاتسيا جاساۋعا مۇمكىندىك پايدا بولدى. ماقسات – ايماقتاعى جەتەكشى كريپتوحابقا اينالۋ.
ەندى ۇكىمەت پەن ۇلتتىق بانك تسيفرلىق اكتيۆتەردى دامىتۋدىڭ باستى باعىتتارىن بەكىتكەنى ءجون.
ودان بولەك پرەزيدەنت كەڭەستىڭ كەلەسى وتىرىسىندا جاساندى ينتەللەكتىنى ونەركاسىپكە ەنگىزۋ ماسەلەسىن قاراستىرۋدى ۇسىندى.
«جاساندى ينتەللەكتىنى ناقتى ۋاقىت رەجيمىندە پايدالانۋ ءوسىمنىڭ باستى فاكتورى سانالا باستادى. سوندىقتان بىزگە دەرەكتەردى، ۇدەرىستەر مەن ادامداردى بىرىكتىرەتىن ءبىرتۇتاس جۇيە قۇرۋ قاجەت. وسىنداي نەگىز قالىپتاسقاندا عانا پيلوتتىق شەشىمدەرمەن شەكتەلمەي، جاساندى ينتەللەكتىنى ەكونوميكانىڭ بارلىق سەكتورىنا ەنگىزۋگە جول اشىلادى. جاھانداعى تەحنولوگيالىق جارىستا بىردە ءبىر ەل ءوز بەتىنشە جاساندى ينتەللەكت الەۋەتىن تولىق پايدالانا المايدى. جاساندى ينتەللەكتىنى دامىتۋ جونىندەگى كەڭەس، ەڭ الدىمەن، ەكونوميكا جانە تسيفرلىق پلاتفورما سالاسىندا كەلىسىلگەن تاسىلدەر ازىرلەپ، وزىق تاجىريبەلەرمەن الماسۋ ءۇشىن قۇرىلدى»، – دەدى پرەزيدەنت.
سوزىنشە، ءوندىرىس – قوسىلعان قۇنى جوعارى ءونىم وندىرەتىن جانە جاڭا تەحنولوگيانى سىناپ كورەتىن ەڭ باستى الاڭ.
