قازاقستانداعى مەملەكەتتىك ەلەكتروندىق قىزمەتتەردە قازاق تىلىندەگى جاساندى ينتەللەكت (جي) جاۋاپتارىنىڭ ساپاسى ورىس تىلىندەگى نۇسقامەن سالىستىرعاندا تومەن ەكەنى انىقتالدى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
باق CAPS Unlock جوباسىنىڭ سايتىندا جاريالانعان زەرتتەۋ ماقالاسى تۋرالى حابارلادى.
زەرتتەۋ اۆتورى جاننات بۇبەكباەۆا eGov Mobile قوسىمشاسىنداعى جي بوتىنا قازاق جانە ورىس تىلدەرىندە بىردەي سۇراقتار قويىپ، سالىستىرمالى تالداۋ جۇرگىزگەن. زەرتتەۋ ناتيجەسىنە سايكەس، ەكى تىلدە دە قاتەلىكتەر تىركەلگەن. دەگەنمەن، قازاق تىلىندەگى جاۋاپتاردا قاتە جيىلىگى مەن اۋىتقۋ دەڭگەيى الدەقايدا جوعارى بولعان. ماسەلەن، ايلىق ەسەپتىك كورسەتكىش (اەك) تۋرالى سۇراققا ورىس تىلىندەگى بوت 3800 تەڭگە دەپ جاۋاپ بەرسە، قازاق تىلىندەگى نۇسقا 73 مىڭ تەڭگە دەپ كورسەتكەن. ال رەسمي دەرەك بويىنشا، اەك مولشەرى 4325 تەڭگە بولىپ بەكىتىلگەن.
سونىمەن قاتار، قازاق تىلىندەگى بوت كەيبىر سۇراقتارعا ءارتۇرلى كۇندە ءارتۇرلى جاۋاپ بەرگەن، بۇل جاۋاپتاردىڭ تۇراقسىزدىعىن كورسەتەدى. زەينەتاقى تۋرالى سۇراقتا دا ايىرماشىلىقتار انىقتالعان: ورىس تىلىندەگى بوت رەسەيگە قاتىستى قاتە دەرەكتەردى كەلتىرسە، قازاق تىلىندەگى نۇسقا قازاقستاننىڭ ءتيىستى مەكەمەلەرىنە دۇرىس سىلتەمە جاساعانىمەن، جالپى جاۋاپ ساپاسى تومەن باعالانعان.
قازىرگى تاڭدا eGov Mobile قوسىمشاسىن 11,7 ميلليوننان استام ازامات پايدالانادى، ال اي سايىن شامامەن 6,4 ميلليون قولدانۋشىعا قىزمەت كورسەتىلەدى.
