قازاقستان اۋعانستانعا ازىق-تۇلىك تاۋارلارى بار جۇكتى جەتكىزۋگە 101,5 ملن تەڭگە جۇمسادى. ەندى بۇل سومانى قر يندۋستريا جانە ينفراقۇرىلىمدىق دامۋ مينيسترلىگىنە ۇكىمەت رەزەرۆىنەن وتەۋ تاپسىرىلدى. ءتيىستى قاۋلى جوباسى "اشىق نقا" پورتالىندا تالقىلاۋعا ورنالاستىرىلدى، دەپ حابارلايدى "ادىرنا" ۇلتتىق پورتالى.
قازاقستاننىڭ قارجى مينيسترلىگى ۇكىمەتتىڭ توتەنشە رەزەرۆىنەن 101,5 ملن تەڭگە بولۋگە دايىن ەكەنىن راستادى.
قازاقستان اۋعانستانعا 2020 جىلدىڭ ماۋسىم ايىندا كومەك كورسەتتى. قر سىرتقى ىستەر مينيسترلىگىنىڭ مالىمەتىنشە، سول كەزدە ەكى مىڭ تونناعا جۋىق جوعارى سۇرىپتى ۇن، 500 توننا ماكارون، 400 مىڭ ليتر وسىمدىك مايى جانە 200 مىڭ بانكا ءسۇت كونسەرۆىلەرى جىبەرىلدى.
ايتا كەتەيىك، ءدال سول جىلدىڭ تامىزىندا قازاقستان اۋعانستان مەن وزبەكستانعا گۋمانيتارلىق كومەك جىبەرگەن ەدى. بۇعان قوسىمشا 16,1 ملن تەڭگە جۇمسالدى. سىرتقى ىستەر مينيسترلىگىنىڭ مالىمەتى بويىنشا، سول كەزدە وزبەكستانعا مىڭ توننا بيداي ۇنى، 250 توننا قاراقۇمىق جارماسى، 92 توننا سارى ماي جانە 19 توننا قويۋلاندىرىلعان ءسۇت جىبەرىلدى، ال توتەنشە جاعدايعا ارنالعان تاۋارلار اۋعانستانعا جونەلتىلگەن.
"ادىرنا" ۇلتتىق پورتالى
