«كەلەشەك مەكتەپتەرى» ۇلتتىق جوباسى قازاقستاندا زاماناۋي مەكتەپ ورتاسىنىڭ بىرىڭعاي ستاندارتىن قالىپتاستىرادى. جاڭا فورماتتاعى مەكتەپتەر ءاربىر بالانىڭ ساپالى ءبىلىم الۋىنا، جان-جاقتى دامۋىنا جانە قاۋىپسىز ورتادا وقۋىنا كەڭ مۇمكىندىك بەرەتىن كەڭىستىككە اينالۋدا.
بۇل ءبىلىم بەرۋ وردالارىنىڭ تەحنيكالىق جابدىقتالۋى اناليتيكالىق ويلاۋ مەن IT-قۇزىرەتتەردەن باستاپ، زەرتتەۋشىلىك جانە شىعارماشىلىق قابىلەتتەرگە دەيىنگى داعدىلاردى قالىپتاستىرۋعا جاعداي جاسايدى.
ماسەلەن، №154 ي.ق.ماندوكي اتىنداعى كەلەشەك مەكتەبىنىڭ 10-سىنىپ وقۋشىسى ءانۋار ەليسۇلى پلاستيك بوتەلكەلەردى قايتا وڭدەۋگە ارنالعان قۇرىلعى جاساپ شىعاردى. بۇل جاس ونەرتاپقىشتىڭ ينجەنەرلىك تاپقىرلىعىمەن قوسا قورشاعان ورتاعا دەگەن قامقورلىعىن كورسەتەتىن بىرەگەي جوبا.
ءانۋاردىڭ ايتۋىنشا، ونىڭ بۇل جوباسى مەكتەبىندەگى STEM زەرتحاناسىنان باستاۋ العان.
«قۇرىلعى قازىرگى تاڭدا وزەكتى بولىپ تابىلاتىن ەكولوگيالىق باعىتتا جاسالدى. ياعني، پلاستيك قالدىقتاردى قايتا وڭدەۋ مەن پايداعا اسىرۋدى كوزدەدىم. پلاستيك بوتەلكەلەردى 3D-دا باسىپ، ەكىنشى رەت پايدالانۋعا جارامدى ەتپەس بۇرىن قالدىق پلاستيكتى شيكىزاتقا اينالدىرۋ قاجەت. مەن وسى تۇسقا باسا نازار اۋدارىپ، قوقىستان شيكىزات جاساپ شىعاردىم. ءوز كاسىبىمدى باستاپ، تاپسىرىستارمەن جۇمىس جاساۋدامىن. ال وسى جولدىڭ ءبارى مەنىڭ مەكتەبىمدەگى زەرتحانادان باستالدى»، – دەيدى ءانۋار ەليسۇلى.
وسىلايشا، كەلەشەك مەكتەپتەرى جاھاندىق ەكولوگيالىق ماسەلەلەرگە بەيجاي قارامايتىن يننوۆاتورلاردى قالىپتاستىرۋدا ۇلكەن الاڭعا اينالىپ وتىر.
