قاراعاندى وبلىسىندا «اشىق پوليتسيا» اكتسياسى ءوتىپ، ءوڭىردىڭ جاس بۋىنى قۇقىق قورعاۋ ورگاندارىنىڭ كۇندەلىكتى قىزمەتىمەن جاقىنىراق تانىسۋعا مۇمكىندىك الدى.
وبلىس ورتالىعىندا ءىس-شارا قاراعاندى قالالىق پوليتسيا باسقارماسىندا ۇيىمداستىرىلدى. ونى قازىبەك بي اتىنداعى اۋدان پروكۋراتۋراسى وتكىزدى. اكتسياعا ستۋدەنتتەر مەن مەكتەپ وقۋشىلارى قاتىسىپ، پوليتسيا جۇمىسىنىڭ ىشكى قۇرىلىمىمەن جانە قىزمەت بارىسىمەن تانىستى.
– كامەلەتكە تولماعاندار اراسىندا قۇقىقتىق ساۋاتتىلىقتى ارتتىرۋ جانە قۇقىق بۇزۋشىلىقتاردىڭ الدىن الۋ ماقساتىندا اۋدان پروكۋراتۋراسى پوليتسيا ورگاندارىندا اشىق ەسىك كۇنىن ۇيىمداستىردى. نەگىزگى مىندەت – جاسوسپىرىمدەرگە زاڭ تالاپتارىن بۇزۋدىڭ قانداي سالدارعا اكەلەتىنىن كوزبەن كورسەتىپ، ناقتى ءتۇسىندىرۋ. ءىس-شارا اياسىندا ارنايى ەكسكۋرسيا ۇيىمداستىرىلدى. ستۋدەنتتەر مەن وقۋشىلار پوليتسيا بولىمشەلەرىن، ۋاقىتشا ۇستاۋ يزولياتورىن، سونداي-اق قابىلداۋ-تاراتۋ ورنىن ارالاپ كوردى، – دەدى قازىبەك بي اتىنداعى اۋدان پروكۋراتۋراسىنىڭ ءبولىم پروكۋرورى گۇلسارا كەرىمجانوۆا.
ءىس-شارا بارىسىندا جاس قاتىسۋشىلارعا پوليتسيا قىزمەتىنىڭ كۇندەلىكتى تىنىس-تىرشىلىگى، بولىمشەلەردىڭ اتقاراتىن مىندەتتەرى جانە قۇقىق بۇزۋشىلىقتاردىڭ الدىن الۋ مەن ولارمەن جۇمىس ىستەۋ ەرەكشەلىكتەرى جان-جاقتى ءتۇسىندىرىلدى.
اكتسيا اشىق ديالوگ فورماتىندا ءوتىپ، جاستار وزدەرىن تولعاندىرعان سۇراقتارىن قويىپ، قۇقىقتىق تاقىرىپتار بويىنشا ناقتى ءارى مازمۇندى جاۋاپتار الدى.
سونىمەن قاتار قالا تۇرعىندارىمەن دە كەزدەسۋ ۇيىمداستىرىلىپ، ازاماتتار قۇقىقتىق ماسەلەلەر بويىنشا كەڭەس الىپ، قۇقىق قورعاۋ ورگاندارىنىڭ قىزمەتىن جەتىلدىرۋگە قاتىستى ءوز ۇسىنىستارىن بىلدىرۋگە مۇمكىندىك الدى.
باستى ماقسات – حالىقتىڭ قۇقىقتىق ساۋاتتىلىعىن ارتتىرۋ جانە قۇقىق قورعاۋ ورگاندارىنا دەگەن سەنىمدى نىعايتۋ.
ساران قالاسىندا «اشىق پوليتسيا» اكتسياسىمەن قاتار مەكتەپ وقۋشىلارىنا ارنالعان زياتكەرلىك كۆيز دە وتكىزىلدى. قالالىق مادەنيەت ۇيىندە زاڭ مەن ادىلەتتى قوعام تاقىرىپتارىنا ارنالعان كىتاپ كورمەلەرى ۇيىمداستىرىلىپ، ال كۆيز بارىسىندا قاتىسۋشىلار قۇقىق، تاريح جانە زاڭناما سالالارىنداعى بىلىمدەرىن سىنعا سالدى.
جەتى كەزەڭنەن تۇرعان ويىن وقۋشىلاردان تەك ءبىلىمدى عانا ەمەس، لوگيكالىق ويلاۋ قابىلەتى مەن جىلدام شەشىم قابىلداۋدى دا تالاپ ەتتى.
بارلىق كوماندالارعا العىس حاتتار تابىستالىپ، ال جەڭىمپازدار مەن جۇلدەگەرلەر ديپلومدارمەن جانە ەستەلىك سىيلىقتارمەن ماراپاتتالدى.
مۇنداي يگى باستامالار قۇقىق قورعاۋ ورگاندارىنىڭ قىزمەتىن قوعام ءۇشىن بارىنشا اشىق، تۇسىنىكتى ءارى قولجەتىمدى ەتۋگە باعىتتالعان.
