فرانتسيانىڭ بۇرىنعى پرەزيدەنتى نيكوليا ساركوزي 2012 جىلعى سايلاۋ ناۋقانى شىعىندارىن اسىرا كورسەتۋ ءىسى بويىنشا شارتتى تۇردە مەرزىمىنەن بۇرىن بوساتىلدى، دەپ حابارلايدى "ادىرنا" ۇلتتىق پورتالى.
RTL مەدياكومپانياسىنىڭ حابارلاۋىنشا، سوت 71 جاستاعى ساياساتكەردىڭ جاسىنا بايلانىستى جازا شارتتارىن جەڭىلدەتۋ تۋرالى ءوتىنىشىن قاناعاتتاندىرعان. شەشىم 7 مامىردان باستاپ كۇشىنە ەنەدى.
ءىس ساركوزيدىڭ 2012 جىلدىڭ پرەزيدەنتتىك سايلاۋ ناۋقانى كەزىندە Bygmalion PR-اگەنتتىگى ارقىلى جاسالعان قارجىلىق وپەراتسيالارعا قاتىستى بولعان. تەرگەۋ مالىمەتىنشە، ساياساتكەردىڭ پارتياسى اگەنتتىكتەن 18 ميلليون ەۋرودان استام قاراجات الىپ، بۇل شىعىنداردى رەسمي ەسەپكە ەنگىزبەگەن.
وسى ءىس بويىنشا سوت نيكوليا ساركوزيدى ءبىر جىلعا باس بوستاندىعىنان ايىرعان ەدى. كەيىن جازا مەرزىمى التى ايعا دەيىن قىسقارتىلىپ، تۇرمە جازاسى ەلەكتروندى بىلەزىك تاعۋمەن الماستىرىلعان. RTL مالىمەتىنشە، ەندى بۇرىنعى پرەزيدەنت ەلەكتروندى باقىلاۋ قۇرىلعىسىن تاقپايتىن بولادى.
نيكوليا ساركوزي 2007–2012 جىلدارى فرانتسيا پرەزيدەنتى قىزمەتىن اتقاردى جانە ناقتى تۇرمە جازاسىنا كەسىلگەن العاشقى بۇرىنعى فرانتسۋز مەملەكەت باسشىسى اتاندى.
