قازاقستاندا سالاعا ينۆەستورلار تارتۋ ماقساتىندا گازدىڭ كوتەرمە باعاسى كوتەرىلۋى مۇمكىن. بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى "ادىرنا".
ۆيتسە-پرەمەردىڭ ايتۋىنشا، قازىرگى ۋاقىتتا قازاقستان گاز بارلاۋ جانە ونىڭ قورى بويىنشا جەتەكشى ەلدەردىڭ قاتارىنا كىرمەيدى، ال تومەن باعالار سالاعا جەتكىلىكتى كولەمدە ينۆەستيتسيا تارتۋعا كەدەرگى بولىپ وتىر.
"باعا ينۆەستورلار ءۇشىن ىنتالاندىرۋشى فاكتور ءارى تارتىمدى جاعداي بولىپ سانالادى. سوندىقتان ءبىز وسى سالاعا ينۆەستورلاردى تارتۋ ءۇشىن گازدىڭ كوتەرمە باعاسىن تاعى ءبىر مارتە كوتەرۋگە ءماجبۇر بولامىز", - دەدى شەنەۋنىك بۇگىن وتكەن بريفينگتە.
ول، ايتپەسە، گازدىڭ باسقا سەبەپپەن - ونى يمپورتتاۋ قاجەتتىلىگىنە بايلانىستى قىمباتتاۋى مۇمكىن ەكەنىن اتاپ ءوتتى.
"نەمەسە گاز باسقا سەبەپتەرمەن قىمباتتايتىن بولادى، ويتكەنى ءبىز ونى سىرتتان يمپورتتايمىز. ال بىزگە گاز يمپورتتايتىن ەلدەر ءبىزدى ايامايدى. ولار ءبىزدىڭ الەۋمەتتىك ساياساتىمىزدى ەسكەرمەيدى", - دەدى جۇمانعارين.
پرەمەر-ءمينيستردىڭ ورىنباسارى سونىمەن قاتار 1 شىلدەدەن باستاپ كوتەرمە تاۋارلىق گازدىڭ باعاسىن 33 پايىزعا كوتەرۋ تۋرالى ەنەرگەتيكالىق كەڭەستىڭ شەشىمى شىققانىن حابارلادى. ونىڭ ايتۋىنشا، بۇل شەشىمنىڭ ينفلياتسياعا اسەرى شامالى بولادى.
"بۇل ينفلياتسيانىڭ شامامەن 0,16 پايىزعا، ياعني 0,2 پايىز شەگىندە وسۋىنە الىپ كەلەدى. بۇل ۇلكەن اسەر ەتپەيدى. مەن تەك كوتەرمە تاۋارلىق گاز تۋرالى ايتىپ وتىرمىن", - دەپ ناقتىلادى جۇمانعارين.
ول سونداي-اق باعانى كوتەرۋ سالانىڭ دامۋى جانە حالىق ءۇشىن قولجەتىمدى جاعدايلاردى ساقتاپ قالۋ ءۇشىن قاجەت ەكەنىن باسا ايتتى.
