الماتىدا تولە بي كوشەسىنىڭ بويىندا بۇرىننان پايدالانىلماي تۇرعان ترامۆاي رەلستەرىن دەمونتاجداۋ جۇمىستارى ءجۇرىپ جاتىر، دەپ حابارلايدى ادىرنا ۇلتتىق پورتالى Tengrinews.kz-كە سىلتەمە جاساپ.
الماتى قالاسى اكىمدىگىنىڭ مالىمەتىنشە، اتالعان جۇمىستار بولاشاق LRT جەلىسىنىڭ قۇرىلىسىنا دايىندىق اياسىندا جۇرگىزىلۋدە. قازىرگى تاڭدا تولە بي كوشەسىنىڭ ساين كوشەسىنەن وتەگەن باتىر كوشەسىنە دەيىنگى بولىگىندە ەسكى رەلستەر مەن بەتون شپالدار الىنىپ جاتىر. ۆەدومستۆو وكىلدەرىنىڭ ايتۋىنشا، دەمونتاجدان شىققان بارلىق ماتەريالدار «الماتىەلەكتروترانس» كومپانياسىنا بەرىلەدى.
قازىر اتالعان اۋماقتا قۇرىلىس تەحنيكاسى جۇمىس ىستەپ، جولدىڭ ورتالىق بولىگى تولىقتاي قۇرىلىس الاڭىنا اينالعان. جۇمىسشىلار ەسكى ترامۆاي جولدارىن بولشەكتەپ، جەردىڭ جوعارعى قاباتىن قازىپ جاتىر. سوعان قاراماستان، كولىك قوزعالىسى ازىرگە شەكتەلمەگەن.
ەسكە سالايىق، الماتىدا ترامۆاي قوزعالىسى 2015 جىلى توقتاتىلعان بولاتىن. بۇعان بىرنەشە ءىرى جول اپاتى سەبەپ بولدى. سول جىلى قىركۇيەك ايىندا تەجەگىشى ىستەن شىققان ترامۆاي بىرنەشە كولىكپەن سوقتىعىسىپ، ادامدار زارداپ شەككەن ەدى. ارادا بىرنەشە اپتا وتكەندە تاعى ءبىر ۇقساس اپات تىركەلىپ، وسىدان كەيىن قالادا ترامۆاي قوزعالىسىن تولىق توقتاتۋ تۋرالى شەشىم قابىلدانعان.
كەيىن الماتىنىڭ بۇرىنعى اكىمى باۋىرجان بايبەك ترامۆاي جۇيەسى جابىلار كەزدە قالادا نەبارى ەكى مارشرۋت پەن التى ترامۆاي عانا جۇمىس ىستەگەنىن ايتقان. ونىڭ سوزىنشە، قوعامدىق كولىكتىڭ بۇل تۇرىنە سۇرانىس از بولعان.
ال جاڭا LRT جەلىسىنىڭ ۇزىندىعى 18,3 شاقىرىم بولادى دەپ جوسپارلانىپ وتىر. جوبا الاتاۋ اۋدانىنداعى تۇرعىن الاپتاردى الماتى-2 تەمىرجول ۆوكزالىمەن بايلانىستىرادى. باعىت باۋىرجان مومىشۇلى كوشەسى، تولە بي كوشەسى جانە ابىلاي حان داڭعىلى ارقىلى وتەدى.
جوسپار بويىنشا، LRT جەلىسىندە ونداعان ستانتسيا سالىنىپ، ول مەترو، BRT جانە اۆتوبۋس باعىتتارىمەن بىرىكتىرىلەدى. قالا بيلىگى جاڭا جۇيە الماتىداعى كولىك قوزعالىسىن جەڭىلدەتىپ، جولاۋشىلار ءۇشىن ىڭعايلى ورتا قالىپتاستىرادى دەپ ەسەپتەيدى.
