الماتى اكىمى دارحان ساتىبالدى قىتاي حالىق رەسپۋبليكاسىنا جاساعان جۇمىس ساپارى اياسىندا قىتايدىڭ ەڭ ءىرى ءارى بەدەلدى كوپسالالى كومپانيالارىنىڭ ءبىرى – 1988 جىلى شانحاي قالاسىندا قۇرىلعان «Yuexing Group» كورپوراتسياسىنىڭ وندىرىستىك جانە ىسكەرلىك كەشەنىنىڭ قىزمەتىمەن تانىستى.
قىتايدىڭ وزىق جەكەمەنشىك كومپانيالارىنىڭ قاتارىنا كىرەتىن «Yuexing Group» بۇگىندە ۇلتتىق نارىقتاعى جەتەكشى ويىنشىلاردىڭ ءبىرى سانالادى. 35 جىلدان استام ۋاقىت ىشىندە كورپوراتسيا جيھاز ءوندىرىسى، بولشەك ساۋدا، دەۆەلوپمەنت، قوناق ءۇي بيزنەسى، كوممەرتسيالىق جىلجىمايتىن مۇلىك پەن سەرۆيستىك قىزمەتتەردى قامتيتىن جان-جاقتى ءارى تۇراقتى بيزنەس قۇرىلىم قالىپتاستىرعان. كومپانيا يننوۆاتسيالىق تاسىلدەرىمەن جانە ءىرى ينۆەستيتسيالىق جوبالاردى جۇزەگە اسىرۋداعى تاجىريبەسىمەن تانىمال.
كەزدەسۋ بارىسىندا الماتى اكىمى ەكىجاقتى ارىپتەستىكتىڭ الەۋەتى جوعارى ەكەنىن اتاپ ءوتىپ، «Yuexing Group» كورپوراتسياسىنىڭ الماتى قالاسىندا بىرقاتار اۋقىمدى ينۆەستيتسيالىق جانە قۇرىلىس جوبالارىن ىسكە اسىرۋ مۇمكىندىگىنە وڭ باعا بەردى. ونىڭ ايتۋىنشا، مەگاپوليس شەتەلدىك ينۆەستورلار ءۇشىن قولايلى جاعداي جاساپ، ونەركاسىپ پەن بيزنەستى دامىتۋعا باعىتتالعان ناقتى تەتىكتەردى ۇسىنا الادى.
«الماتى قالاسىندا ءوندىرىستى ورنالاستىرۋعا جانە ءىرى جوبالاردى جۇزەگە اسىرۋعا ارنالعان بارلىق قاجەتتى ينفراقۇرىلىمى بار يندۋستريالىق ايماق جۇمىس ىستەيدى. سونىمەن قاتار، ءبىزدىڭ شاھار سىزدەردىڭ كومپانيالارىڭىز ءۇشىن ەۋرازيالىق ەكونوميكالىق وداق نارىعىنا شىعاتىن ءتيىمدى لوگيستيكالىق جانە ەكونوميكالىق قاقپا بولا الادى»، — دەدى دارحان ساتىبالدى.
كەلىسسوزدەر ناتيجەسىندە الماتى قالاسى اكىمدىگى مەن «Yuexing Group» كورپوراتسياسى قۇرىلىس سالاسىنداعى ءوزارا ىنتىماقتاستىقتى دامىتۋعا باعىتتالعان الدىن الا كەلىسىمگە قول قويدى. اتالعان قۇجات الداعى ۋاقىتتا ناقتى ينۆەستيتسيالىق جوبالاردى پىسىقتاۋعا جانە ەكى تاراپ اراسىنداعى سەرىكتەستىكتى جاڭا دەڭگەيگە كوتەرۋگە جول اشادى.
