حانتاۆيرۋس تارالعان MV Hondius كرۋيزدىك لاينەرىنەن ەۆاكۋاتسيالانعان جولاۋشىلارعا 42 كۇندىك كارانتين ۇستانۋ ۇسىنىلدى. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيەسۋس مالىمدەدى، دەپ حابارلايدى «ادىرنا» ءتىلشىسى.
ء«بىزدىڭ ۇسىنىمىمىز ايقىن: 10 مامىردان باستاپ 42 كۇن بەلسەندى مەديتسينالىق باقىلاۋ، ياعني 42 كۇندىك كارانتين. كارانتيندى ارنايى مەكەمەدە دە، ءۇي جاعدايىندا دا وتكىزۋگە بولادى»، – دەدى ول كانار ارالدارىنا كەلگەن MV Hondius كەمەسىندەگى جولاۋشىلاردى ەۆاكۋاتسيالاۋدىڭ العاشقى كۇنى اياقتالعاننان كەيىن وتكەن بريفينگتە.
گەبرەيەسۋس ددۇ تەك ۇسىنىم بەرەتىنىن، بىراق ونى مەملەكەتتەرگە مىندەتتەمەيتىنىن اتاپ ءوتتى.
«ەلدەر وزدەرىنىڭ ۇلتتىق نۇسقاۋلىقتارىن باسشىلىققا الادى جانە تاۋەكەلدى باعالاۋ نەگىزىندە ءتيىستى شارالاردى قابىلدايدى»، – دەپ قوستى ول.
10 مامىر كۇنى يسپانيا جانە بىرقاتار باسقا ەلدەر MV Hondius كرۋيزدىك لاينەرىندە حانتاۆيرۋس ورشۋىنە بايلانىستى ءوز ازاماتتارىن ەۆاكۋاتسيالاۋدى باستاعان ەدى. جولاۋشىلار ارنايى رەيستەرمەن تاسىمالدانىپ، كارانتينگە ورنالاستىرىلۋدا. كانار ارالدارىنان 90-نان استام ادام ارنايى رەيستەرمەن ءوز ەلدەرىنە قايتارىلادى دەپ كۇتىلىپ وتىر.
العاش بولىپ تەنەريفەدەن يسپانيا، فرانتسيا جانە ۇلىبريتانيا ازاماتتارى ەۆاكۋاتسيالاندى. يسپان جولاۋشىلارى مادريدكە جەتكىزىلگەننەن كەيىن اسكەري گوسپيتالدە مىندەتتى كارانتينگە جىبەرىلدى، ال بريتاندىقتار مەن فرانتسۋزدار تيىسىنشە مانچەستەر مەن پاريجگە جەتكىزىلدى. وپەراتسيا بارىسىندا توتەنشە قىزمەت ماماندارى قورعانىش كيىمدەرىن كيىپ، ارنايى سانيتارلىق شارالاردى قولداندى.
سونداي-اق اقش، يرلانديا جانە تۇركيا ازاماتتارىن ەۆاكۋاتسيالاۋ رەيستەرى دە جوسپارلانعان. وپەراتسيا اياقتالعاننان كەيىن كەمەدە 60 ادامنان از جولاۋشى قالادى دەپ كۇتىلۋدە.
ارگەنتينادان كابو-ۆەردە باعىتىمەن كەلە جاتقان كرۋيزدىك كەمەدە حانتاۆيرۋس جۇقتىرعان 7 جاعداي انىقتالعان، ونىڭ ىشىندە 3 ءولىم تىركەلگەن. بۇعان دەيىن يسپانيا حانتاۆيرۋس جۇقتىرعان كەمە جولاۋشىلارىن كانار ارالدارىندا قابىلدايتىنى حابارلانعان ەدى.
حانتاۆيرۋس العاش رەت يزرايلدە شىعىس ەۋروپادان كەلگەن ناۋقاستا انىقتالعان. سونىمەن قاتار لاينەردە ۇلىبريتانيانىڭ ەكى ازاماتى دا جۇقتىرعانى بەلگىلى بولدى. دۇنيەجۇزىلىك دەنساۋلىق ساقتاۋ ۇيىمى حانتاۆيرۋستىڭ ادامنان ادامعا جۇعۋ مۇمكىندىگىن جوققا شىعارمايدى.
ايتا كەتەيىك، دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحان گەبرەيەسۋستىڭ ۇلى ءجۇرسىن ەرماننىڭ جيەنىنە ۇيلەنگەن. ول قازاققا قۇدا بولىپ كەلەدى.
