اقمولا وبلىسىندا 2026 جىلى ءۇش ءىرى ەكولوگيالىق پارك اشۋ كوزدەلىپ وتىر. قازىرگى تاڭدا جوبالار زەرەندى، اقكول جانە تسەلينوگراد اۋداندارىندا كەزەڭ-كەزەڭىمەن جۇزەگە اسىرىلۋدا.
وبلىستىق تۋريزم باسقارماسىنىڭ ءباسپاسوز حاتشىسى اسەم مۇقىموۆانىڭ مالىمەتىنشە، ەكوپاركتەردىڭ ءبىرى زەرەندى اۋدانىندا ورنالاسقان دەمالىس ايماعى نەگىزىندە قالىپتاسىپ، بۇگىندە كەلۋشىلەرگە ەسىگىن ايقارا اشقان. كوكشەتاۋ قالاسىنان نەبارى 50 شاقىرىم قاشىقتىقتا ورنالاسۋى نىساندى قىسقا مەرزىمدى دەمالىس ءۇشىن قولايلى ورىنعا اينالدىرىپ وتىر. اۋماعى زەرەندى كولى مەن «كوكشەتاۋ» مەملەكەتتىك ۇلتتىق تابيعي پاركىمەن شەكتەسەتىندىكتەن، مۇنداعى تۋريستىك الەۋەت جوعارى باعالانۋدا. جوبا اياسىندا ەكولوگيالىق تۋريزم مەن بەلسەندى دەمالىس باعىتتارى دامىتىلىپ، جاياۋ جانە ۆەلوجولدار، سپورت الاڭدارى، سونداي-اق شاڭعى-روللەرلىك تراسسا قاراستىرىلعان.
بۇگىندە دەمالىس ايماعىندا ينفراقۇرىلىمدىق جۇمىستار جۇرگىزىلىپ، ساندىك كىرەبەرىس اركا، ورىندىقتار مەن قوقىس جاشىكتەرى ورناتىلعان، جارىقتاندىرۋ جۇيەسى ىسكە قوسىلعان. سونىمەن قاتار اتكەنشەكتەر، فوتوزونا، ۆوركاۋت جانە سپورت الاڭدارى پايدالانۋعا بەرىلگەن. الداعى ۋاقىتتا تۋريستىك سوقپاقتاردى اباتتاندىرۋ جانە «سمولنايا» شوقىسىنا قاراۋ الاڭىن سالۋ جوسپارلانىپ وتىر.
اقكول اۋدانىندا دا ەكوتۋريزم باعىتىنداعى اۋقىمدى جوبا جۇزەگە اسىرىلۋدا. 60 گەكتار اۋماقتى قامتيتىن ەكوپارك «Wyndham Residence Aqkol» قوناقۇي كەشەنى جانىنان دامىپ كەلەدى. استانا قالاسىنان شامامەن 120 شاقىرىم قاشىقتىقتا ورنالاسقان بۇل اۋماق ەلوردا تۇرعىندارى ءۇشىن دە قولجەتىمدى دەمالىس ورنى بولماق. جوبا شەڭبەرىندە گلەمپينگ ايماقتارى، قوناق ۇيلەر، جاياۋ جانە ۆەلوجولدار، سونداي-اق ەمدىك-ساۋىقتىرۋ باعىتىنداعى ينفراقۇرىلىم قاراستىرىلعان.
قازىرگى ۋاقىتتا مۇندا سەرۋەن باعىتتارى قالىپتاستىرىلعان. بۇدان بولەك، ەكولوگيالىق تازا ماتەريالداردى پايدالانا وتىرىپ بەس تۋريستىك سوقپاق سالۋ، ورىندىقتار مەن باعىتتاۋشى بەلگىلەر ورناتۋ، مۇمكىندىگى شەكتەۋلى ازاماتتارعا ارنالعان تاكتيلدى جولاقتار جاساۋ جوسپارلانۋدا. جوبانى تولىق اياقتاۋ مەرزىمى بيىلعى جىلدىڭ 1 تامىزى دەپ بەلگىلەنىپ وتىر.
تسەلينوگراد اۋدانىنداعى «BalQaragai» دەمالىس ايماعى دا ەكوپارك رەتىندە قايتا جاڭعىرىپ كەلەدى. 55 گەكتار اۋماقتى قامتيتىن بۇل كەشەن استاناعا جاقىن ورنالاسۋىنىڭ ارقاسىندا وتباسىلىق جانە قىسقا مەرزىمدى تۋريزم ءۇشىن تارتىمدى ورىنعا اينالماق. مۇندا دەمالىس پەن تابيعاتتى تاماشالاۋعا ارنالعان ايماقتارمەن قاتار سپورتتىق-ويىن-ساۋىق ينفراقۇرىلىمى دا جۇمىس ىستەپ تۇر: ەتنواۋىل، اكۆاپارك، سپورت الاڭدارى، اتپەن سەرۋەندەۋ مانەجى، بالالار الاڭدارى مەن وزگە دە نىساندار بار.
جوبا اياسىندا قوسىمشا تۋريستىك سوقپاقتار مەن ات مارشرۋتتارىن دامىتۋ، كەمپينگ الاڭىن قۇرۋ جانە ۆەلوجولدار سالۋ جوسپارلانعان.
وبلىستا ەكوتۋريزمدى دامىتۋ تەك دەمالىس ورىندارىمەن شەكتەلمەي، جاڭا تۋريستىك باعىتتاردى قالىپتاستىرۋمەن دە ۇشتاسىپ وتىر. سونىڭ ىشىندە ساكرالدى جانە تاريحي-مادەني نىساندارعا باعىتتالعان مارشرۋتتاردى دامىتۋعا باسىمدىق بەرىلگەن. بۋراباي ءوڭىرىنىڭ تاريحي-ارحەولوگيالىق الەۋەتىن اشۋ دا كۇن تارتىبىندە تۇر.
ۆەدومستۆو وكىلىنىڭ ايتۋىنشا، 2024 جىلدان بەرى جۇرگىزىلگەن ارحەولوگيالىق زەرتتەۋلەر ناتيجەسىندە بىرقاتار قۇندى نىساندار انىقتالعان. سولاردىڭ نەگىزىندە الداعى ماۋسىمدا جاڭا تۋريستىك باعىتتار ىسكە قوسىلادى دەپ كۇتىلۋدە. اتاپ ايتقاندا، «مۇرتتى قورعاندار» سياقتى كونە ەسكەرتكىشتەردى قامتيتىن مارشرۋتتار جەكە ينۆەستيتسيالار ەسەبىنەن دە دامىتىلماق.
«تۋريستەرگە ءوڭىردىڭ باي تاريحى مەن مادەني مۇراسىن كەڭىنەن تانىستىرۋعا باعىتتالعان ارنايى ەكسكۋرسيالار ۇسىنىلادى»، - دەدى اسەم مۇقىموۆا.
ايتا كەتەيىك، قازىرگى تاڭدا «كوكشەتاۋ» مەملەكەتتىك ۇلتتىق تابيعي پاركىندە جالپى ۇزىندىعى 180 شاقىرىمنان اساتىن 27 تۋريستىك باعىت جۇمىس ىستەپ تۇر.
جالپى جوسپارعا سايكەس، 2028 جىلعا دەيىن اقمولا وبلىسىندا جەتى ەكوپارك قۇرۋ كوزدەلگەن. بۇل باستاما ءوڭىردى ەلىمىزدەگى ەكوتۋريزمنىڭ ماڭىزدى ورتالىقتارىنىڭ بىرىنە اينالدىرۋعا باعىتتالىپ وتىر.
