كوكشەتاۋ قالاسىندا قارتتار كۇنىنە وراي وبلىستىق اۋىل شارۋاشىلىعى ونىمدەرىنىڭ جارمەڭكەسى ءوتتى. جارمەڭكەگە اقمولا وبلىسىنىڭ 10 اۋدانىنان اۋىل شارۋاشىلىعى تاۋار وندىرۋشىلەرى قاتىسىپ، قالا تۇرعىندارىنا 200 توننادان استام ءونىم ۇسىندى. ساۋدا ءۇشىن 50 پاۆيلوندا 100 ساۋدا ورنى ۇيىمداستىرىلدى.
جارمەڭكەدە تۇرعىندار اراسىندا سۇرانىسقا يە ازىق-تۇلىك ونىمدەرىنىڭ كەڭ اسسورتيمەنتى ۇسىنىلدى. اتاپ ايتقاندا، شامامەن 50 توننا ەت ونىمدەرى، 20 توننا ءسۇت ونىمدەرى، 40 تونناعا جۋىق كوكونىس پەن كارتوپ جەتكىزىلدى. سونىمەن قاتار بالىق، جۇمىرتقا، ۇن، جارما، وسىمدىك مايى، ماۋسىمدىق تاۋارلار مەن كوشەت ونىمدەرىن ساتىپ الۋعا مۇمكىندىك بولدى.
ونىمدەردىڭ ءبىر بولىگى نارىقتاعى باعادان 10–15 پايىزعا تومەن باعامەن ساتىلدى. اسىرەسە الەۋمەتتىك ماڭىزى بار ازىق-تۇلىك تاۋارلارىنا سۇرانىس جوعارى بولدى.
«بۇگىنگى جارمەڭكە ەڭ الدىمەن 1 قازاندا اتاپ وتىلەتىن قارتتار كۇنىنە ارنالدى. وسىعان وراي اي بويى ءتۇرلى ءىس-شارالار ۇيىمداستىرىلادى. بۇگىنگى جارمەڭكە دە وسى ايلىق اياسىنداعى شارالاردىڭ ءبىرى. تۇرعىنداردىڭ بەلسەندىلىگى جوعارى. بۇل بىزدە قالىپتاسقان جاقسى داستۇرگە اينالدى. اۋىل شارۋاشىلىعى تاۋار وندىرۋشىلەرىنىڭ دە كوڭىل-كۇيى جاقسى»، — دەدى اقمولا وبلىسى اكىمىنىڭ ورىنباسارى بالپان مۇرات.
جارمەڭكەدە تۇراقتاندىرۋ قورىنداعى ونىمدەرگە دە ەرەكشە سۇرانىس بايقالدى. تۇرعىندارعا سيىر ەتى، قانت، كۇرىش، ءبىرىنشى سۇرىپتى ۇن، تۇز، كۇنباعىس مايى، ماكارون ونىمدەرى، كارتوپ پەن ءسابىز ۇسىنىلدى. الەۋمەتتىك ماڭىزى بار بىرقاتار تاۋاردىڭ باعاسى نارىقتاعى قۇنىنان 10–15 پايىزعا تومەن بولدى.
جارمەڭكەگە اۋىل شارۋاشىلىعى ونىمدەرىن وندىرۋمەن قاتار، ولاردى قايتا وڭدەۋمەن اينالىساتىن كاسىپورىندار دا قاتىستى.
ء«بىزدىڭ كاسىپورنىمىز – «سوچينسكوە اگرو». ارشالى اۋدانىنداعى سوچينسكوە اۋىلىن تانىستىرىپ وتىرمىز. ءبىز تابيعي ەت ونىمدەرىن وندىرەمىز. ءوزىمىزدىڭ شاعىن فەرمامىز جانە شۇجىق تسەحىمىز بار. ەتتى قايتا وڭدەپ، تابيعي ءارى ساپالى ءونىم شىعارامىز. كوكشەتاۋ تۇرعىندارى ءبىزدىڭ ءونىمدى جاقسى بىلەدى. جارمەڭكەلەرگە بىرنەشە رەت قاتىسىپ ءجۇرمىز، سوندىقتان تۇراقتى تۇتىنۋشىلارىمىز دا قالىپتاستى»، – دەدى «سوچينسكوە اگرو» كاسىپورنىنىڭ وكىلى مارينا كوندراتەنكو.
مۇنداي اۋىل شارۋاشىلىعى جارمەڭكەلەرى جەرگىلىكتى تاۋار وندىرۋشىلەرگە ءوز ونىمدەرىن تۇتىنۋشىلارعا تىكەلەي ۇسىنۋعا، وتكىزۋ نارىعىن كەڭەيتۋگە جانە وڭىرلىك نارىقتاعى وتاندىق ءونىمنىڭ ۇلەسىن ارتتىرۋعا مۇمكىندىك بەرەدى. ال قالا تۇرعىندارى ءۇشىن بۇل – جەرگىلىكتى جەردە وندىرىلگەن ساپالى ازىق-تۇلىكتى قولجەتىمدى باعامەن ساتىپ الۋعا قولايلى مۇمكىندىك.
