پرەمەر-ءمينيستردىڭ وكىمىمەن جامبىل وبلىسىنداعى بايزاق، جامبىل، قورداي، مەركى، تۇرار رىسقۇلوۆ جانە تالاس اۋداندارىندا توتەنشە جاعداي جاريالاندى. بۇعان سەبەپ - قۋاڭشىلىق، دەپ حابارلايدى “ادىرنا” ۇلتتىق پورتالى.
جامبىل وبلىسىنداعى اۋدانداردا اۋا-رايىنىڭ قالىپتان تىس ىستىق بولۋى جانە سۋدىڭ تاپشىلىعى سالدارىنان توتەنشە جاعداي جاريالاندى.
وسى جىلى وبلىس بويىنشا سۋارمالى سۋدىڭ جەتىسپەۋشىلىگى مەن تەمپەراتۋرانىڭ قالىپتان جوعارى بولۋىنا بايلانىستى داقىلداردىڭ شىعىنى بىلتىرعا قاراعاندا 25-30 پايىزعا تومەن بولادى دەگەن بولجام بار.
ۇكىمەت باسشىسىنىڭ حاتتامالىق تاپسىرماسىنا سايكەس ارنايى جۇمىس توبى قۇرىلدى.
توپ قۇرامىنا اۋىل شارۋاشىلىعى، قارجى، توتەنشە جاعدايلار مينيسترلىكتەرىنىڭ، ەكولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ، «قازسۋشار» جامبىل وبلىستىق فيليالىنىڭ جانە جەرگىلىكتى اتقارۋشى ورگانداردىڭ وكىلدەرى ەنگەن.
جۇمىس توبى ەگىس القاپتارىن ارالاپ، جەرگىلىكتى جەرلەردەگى جاعدايمەن تانىسىپ، شارۋا قوجالىقتارىمەن كەزدەسۋلەر وتكىزدى.
بۇگىنگى تاڭدا وبلىستىڭ التى اۋدانىندا (قورداي، مەركى، ت.رىسقۇلوۆ، تالاس، بايزاق جانە جامبىل) شىعىندى انىقتاۋ بويىنشا قۇرىلعان جۇمىس توپتارىنىڭ عىلىمي زەرتتەۋ ينستيتۋتتارىمەن بىرلەسكەن جۇمىسى جالعاسىپ جاتىر.
شارۋا قوجالىقتارىنا كەلتىرىلگەن شىعىن كولەمىن انىقتاۋ شارالارى ءونىم تولۆق پىسكەنشە ناقتىلانىپ، جاقىن كۇندەرى جارامسىز قالعان اۋماق پەن شىعىن مولشەرى تۇپكىلىكتى ايقىندالادى.
بۇعان بايلانىستى جامبىل وبلىسىنىڭ اكىمى جاۋاپتىلارعا شارۋالاردىڭ شىعىن كولەمىن انىقتاۋ ناقتى دالەلمەن ءارى زاڭدى تۇردە جۇزەگە اسۋىن قاتاڭ باقىلاۋدا ۇستاۋ بويىنشا حاتتامالىق تاپسىرما جۇكتەدى.
“ادىرنا” ۇلتتىق پورتالى
