اتوم ەنەرگياسى جونىندەگى اگەنتتىك توراعاسىنىڭ ورىنباسارى اسەت ماحامبەتوۆ قازاقستاندا اەس قۇرىلىسى تۋرالى اقپاراتتىڭ ءبىر بولىگى نەگە قۇپيا بولۋى مۇمكىن ەكەنىن ءتۇسىندىردى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
ايتۋىنشا، بۇل بولاشاق اەس-كە ارنالعان جابدىق جەتكىزۋشىلەرىنە قاتىستى تەحنيكالىق جانە كوممەرتسيالىق اقپارات بولۋى مۇمكىن.
«اەس قۇرىلىسى كەزىندە ءتۇرلى جابدىق قولدانىلۋى ىقتيمال. جابدىق جەتكىزۋشىلەرى ولاردىڭ قۇنى تۋرالى مالىمەتتەردىڭ باسەكەلەستەرىنە نەمەسە ءۇشىنشى تاراپقا جاريا بولعانىن قالاماۋى مۇمكىن. سوندىقتان مۇنداي اقپارات قۇپيا ساناتقا ەنۋى ىقتيمال»،-دەدى ماحامبەتوۆ ءماجىلىس كۋلۋارىندا.
ول ازىرگە بارلىق سەبەپتى تولىق ايتا المايتىنىن، تەك اقپاراتقا قولجەتىمدىلىك شەكتەلۋى مۇمكىن جاعدايلاردىڭ ءبىرىن مىسال رەتىندە كەلتىرگەنىن اتاپ ءوتتى.
بۇعان دەيىن قازاقستانداعى العاشقى اتوم ەلەكتر ستانتسياسىنىڭ قۇرىلىسىنا قاتىستى اقپاراتتىڭ ءبىر بولىگىنە قولجەتىمدىلىك شەكتەلۋى مۇمكىن ەكەنى حابارلانعان بولاتىن.
سونداي-اق اتوم ەنەرگياسى اگەنتتىگى بۇل ماسەلەدە بارىنشا اشىقتىق ۇستانىمىن ساقتايتىنىن مالىمدەدى.
«اەس قۇرىلىسىنا قاتىستى ىنتىماقتاستىقتىڭ نەگىزگى شارتتارى اشىق دەرەككوزدەردە جاريالانادى. الايدا جوبانىڭ تەحنولوگيالىق ەرەكشەلىكتەرى مەن اۋقىمىن، سونداي-اق حالىقارالىق تاجىريبەنى ەسكەرە وتىرىپ، كەيبىر ماسەلەلەر قۇپيانى جاريا ەتپەۋ تۋرالى كەلىسىمدەرمەن رەتتەلەدى. سول سەبەپتى بەلگىلى ءبىر اقپاراتتىڭ تارالۋى شەكتەلۋى مۇمكىن»،- دەپ ءتۇسىندىردى ۆەدومستۆو.
