يزرايل پرەمەر-ءمينيسترى بينيامين نەتانياحۋ بىرىككەن اراب امىرلىكتەرىنە جاسىرىن ساپارمەن بارىپ، ەل پرەزيدەنتى مۇحاممەد بين زايد ءال ناحايانمەن كەزدەستى. بۇل تۋرالى يزرايل پرەمەرىنىڭ كانتسەليارياسى X پلاتفورماسىندا جازدى، دەپ حابارلايدى «ادىرنا» ءتىلشىسى.
سارسەنبى كۇنى كەشكە جاريالانعان حابارلامادا بۇل كەزدەسۋدىڭ ەكى ەل قاتىناسىنا «تاريحي سەرپىلىس» اكەلگەنى ايتىلعان. Reuters دەرەگىنە سايكەس، نەتانياحۋ مەن ءباا پرەزيدەنتىنىڭ كەزدەسۋى ومان شەكاراسىنا جاقىن ورنالاسقان ەل-اين قالاسىندا بىرنەشە ساعاتقا سوزىلعان.
الايدا كوپ ۇزاماي ءباا سىرتقى ىستەر مينيسترلىگى بۇل اقپاراتتىڭ شىندىققا سايكەس كەلمەيتىنىن مالىمدەدى.
ء«باا مەن يزرايل قارىم-قاتىناسى اشىق تۇردە، بەلگىلى جانە رەسمي تۇردە بەكىتىلگەن اۆراام كەلىسىمدەرى نەگىزىندە جۇزەگە اسادى جانە قۇپيا نەمەسە بەيرەسمي كەلىسىمدەرگە نەگىزدەلمەگەن. سوندىقتان رەسمي تۇردە راستالماعان جاسىرىن ساپارلار نەمەسە كەلىسىمدەر تۋرالى كەز كەلگەن مالىمدەمە مۇلدەم نەگىزسىز»، — دەلىنگەن حابارلامادا.
ايتا كەتەيىك، يزرايل مەن اقش يرانعا قارسى جۇرگىزىپ جاتقان سوعىس بارىسىندا يراندىق اسكەر بىرنەشە رەت ءباا اۋماعىنا سوققى جاساعان. تەگەران سونىمەن قاتار بۇل ەلدى اقش جانە يزرايلمەن تىعىز بايلانىسى ءۇشىن ۇنەمى سىنعا الىپ كەلگەن ەدى.
