ءماجىلىس دەپۋتاتتارى «مەملەكەتتىك ناگرادالار تۋرالى» زاڭعا ەنگىزىلەتىن تۇزەتۋلەردى ماقۇلدادى، دەپ حابارلايدى “ادىرنا” ۇلتتىق پورتالى.
قۇجاتتاعى باستى وزگەرىستەردىڭ ءبىرى – كونستيتۋتسيادان ەلباسى مارتەبەسىنە قاتىستى نورمالار الىنىپ تاستالعانىنا قاراماستان، تۇڭعىش پرەزيدەنتتىڭ اتى بەرىلگەن وردەننىڭ ناگرادالار جۇيەسىندە ساقتالۋى بولدى.
الايدا وردەننىڭ قۇقىقتىق مارتەبەسى وزگەردى. بۇعان دەيىن ەرەكشە ناگرادا رەتىندە جەكە باپپەن بەكىتىلگەن «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنى ەندى جالپى مەملەكەتتىك ناگرادالار تىزىمىنە ەنگىزىلدى. زاڭنان وسى وردەننىڭ ايرىقشا مارتەبەسىن ايقىندايتىن 12-1-باپ الىنىپ تاستالىپ، ونىڭ سيپاتتاماسى ورتاق 13-3-باپقا كوشىرىلگەن.
سونىمەن قاتار زاڭعا ءۇش جاڭا وردەن ەنگىزىلدى. «AL-FARABI» وردەنى عىلىم مەن ءبىلىم سالاسىنا ۇلەس قوسقان ازاماتتارعا تابىستالادى. «QOJA AHMET YASAUI» وردەنى مەملەكەتتىلىك، قوعامدىق جانە رۋحاني سالاداعى ەرەكشە ەڭبەگى ءۇشىن بەرىلەدى. ال «مەيىرىم» وردەنى ەرىكتىلەر، مەتسەناتتار مەن قايىرىمدىلىقپەن اينالىساتىن ازاماتتارعا ارنالماق.
تۇزەتۋلەر كۇشتىك قۇرىلىمدارعا قاتىستى ماراپاتتارعا دا اسەر ەتكەن. ەندى «ايبىن» وردەنىمەن جوعارى وفيتسەرلىك قۇرام وكىلدەرى دە ناگرادتالۋى مۇمكىن.
زاڭداعى تاعى ءبىر وزگەرىس – ناگرادالاردىڭ اتاۋى ەندى تەك مەملەكەتتىك تىلدە جازىلادى. بۇرىنعىداي ورىسشا اۋدارماسى جاقشا ىشىندە كورسەتىلمەيدى.
