«Qazaq Media Association» زاڭدى تۇلعالار جانە جەكە كاسىپكەرلەر بىرلەستىگى «جاس الاش» جشس، «Almaty Aqparat» مەدياحولدينگى جانە «قالا مەن دالا» گازەتىمەن ءوزارا ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويدى.
تاراپتار مەموراندۋم نەگىزىندە قازاقتىلدى اقپارات كەڭىستىگىن دامىتۋ، رەداكتسيالار اراسىنداعى كاسىبي بايلانىستى نىعايتۋ، مەديا سالاداعى ورتاق باستامالاردى قولداۋ جانە اقپاراتتىق ارىپتەستىكتى كەڭەيتۋگە كەلىستى.
مەموراندۋمعا «Qazaq Media Association» زتججكب توراعاسى ەربول ازانبەك، «Almaty Aqparat» مەدياحولدينگىنىڭ باس ديرەكتورى ەرجان قالىمبايۇلى، «جاس الاش» جشس ديرەكتورى رينات راحيموۆ جانە «قالا مەن دالا» گازەتىنىڭ وكىلى جاراس نيازبەك قول قويدى.
«Qazaq Media Association» قۇرامىنا قازاقتىلدى ينتەرنەت-باسىلىمدار مەن اقپاراتتىق پلاتفورمالار كىرەدى. ال «Almaty Aqparat» مەدياحولدينگى قۇرامىنا «الماتى اقشامى» جانە «ۆەچەرني الماتى» گازەتتەرى مەن ءۇش اقپاراتتىق رەسۋرس پەن الەۋمەتتىك جەلىلەر كىرەدى. «جاس الاش» جشس قۇرامىنا «جاس الاش» گازەتى مەن سايتى كىرەدى. «قالا مەن دالا» گازەتى قازىرگى تاڭداعى جەكەمەنشىك ساناۋلى گازەتتەردىڭ ءبىرى.
«Qazaq Media Association» زتججكب توراعاسى ەربول ازانبەك مەموراندۋمنىڭ ماڭىزىنا توقتالىپ:
«قازاق مەدياسىنىڭ الدىندا بىرلەسە شەشۋدى قاجەت ەتەتىن ورتاق مىندەت كوپ. اقپاراتتىق قاۋىپسىزدىك، ساپالى كونتەنت، قازاق اۋديتورياسىنىڭ سۇرانىسىنا ساي جاڭا فورماتتار، قارجىلاندىرۋ - مۇنىڭ ءبارى تىزە قوسا جۇمىس ىستەۋدى قاجەت ەتەدى. بۇل مەموراندۋم - باسەكەلەستىكتەن بۇرىن سەرىكتەستىك مادەنيەتىن قالىپتاستىرۋعا جاسالعان قادام. قاۋىمداستىق الداعى ۋاقىتتا ءتۇرلى باعىتتار بويىنشا جۇمىسىن جانداندىرادى. اتاپ ايتقاندا، الداعى كۇندەرى رەسپۋبليكا كولەمىندە قاۋىمداستىق قۇرامىنا كىرۋگە نيەت تانىتىپ وتىرعان باق-تاردى قابىلداۋ جۇمىستارىن جالعاستىرامى. جۋىردا استانادا، الماتىدا بارلىق باق وكىلدەرىنىڭ باسىن قوسىپ، ورتاق ماسەلەلەردى شەشۋ جولىن تالقىلايمىز. سونىمەن قاتار، قىرعىزستان، وزبەكستان، ازەربايجان جانە تۇركيا جۋرناليستەر قاۋىمداستىقتارىمەن ىنتىماقتاسا جۇمىس ىستەۋ جايى دا پىسىقتالۋدا»،- دەدى.
«Almaty Aqparat» مەدياحولدينگى باس ديرەكتورى ەرجان قالىمبايۇلى:
«قازاقتىلدى مەديا ءبىر-ءبىرىن قولداعاندا عانا ىقپالدى اقپاراتتىق ورتا قالىپتاسادى. ءبىز تاجىريبە الماسۋعا، ورتاق جوبالار جاساۋعا جانە كاسىبي بايلانىستاردى كۇشەيتۋگە مۇددەلىمىز»، - دەدى.
«جاس الاش» جشس اتقارۋشى ديرەكتورى رينات راحيموۆ:
«بۇگىنگى مەديا كەڭىستىكتە ساپالى جۋرناليستيكا مەن جاۋاپتى اقپارات تاراتۋ ەرەكشە ماڭىزدى. وسىنداي ىنتىماقتاستىق الاڭدارى قازاق ءباسپاسوزىنىڭ جاڭا دەڭگەيگە كوتەرىلۋىنە مۇمكىندىك بەرەدى»، - دەپ اتاپ ءوتتى.
«قازاق ءباسپاسوزى قوعامداعى ماڭىزدى ماسەلەلەردى كوتەرىپ، ۇلتتىق مۇددەگە قىزمەت ەتۋى كەرەك. بۇل مەموراندۋم - ءار رەداكتسيانىڭ تاجىريبەسىن بىرىكتىرىپ، وقىرمانعا ساپالى ءارى سەنىمدى اقپارات ۇسىنۋعا باعىتتالعان ماڭىزدى قادام. ورتاق قۇندىلىقتار توڭىرەگىندە بىرىگۋ - بۇگىنگى ۋاقىتتىڭ تالابى»، - دەدى «قالا مەن دالا» گازەتىنىڭ وكىلى جاراس نيازبەك.
تاراپتار الداعى ۋاقىتتا بىرلەسكەن مەديا-جوبالاردى جۇزەگە اسىرۋ، كاسىبي فورۋمدار مەن كەزدەسۋلەر وتكىزۋ، جۋرناليستەردىڭ تاجىريبەلەرىن شىڭداپ، ءبىر-بىرلەرىنە اقپاراتتىق قولداۋ كورسەتۋ جانە قازاقتىلدى كونتەنتتى دامىتۋ باعىتىندا بىرلەسە جۇمىس جۇرگىزۋگە ۋاعدالاستى.
