ولجاس بەكتەنوۆ قاقتىعىس ايماقتارىنا ەل ازاماتتارىنىڭ بارۋىن زاڭنامالىق تۇرعىدان شەكتەۋ تەتىكتەرى ازىرلەنەتىنىن مالىمدەدى، دەپ حابارلايدى "ادىرنا" ۇلتتىق پورتالى.
پرەمەر-ءمينيستردىڭ ايتۋىنشا، قاۋىپسىزدىك جاعدايى كۇردەلەنگەن وڭىرلەرگە ازاماتتاردىڭ ساپارىنا قاتىستى الدىن الۋ شارالارىن كۇشەيتۋ قاجەت.
«ەۆاكۋاتسيالىق كەزەڭدە كەيبىر ازاماتتاردىڭ قاقتىعىس ايماقتارىنا ساپارىن جالعاستىرۋى قوسىمشا جۇكتەمە تۋعىزدى. وسىعان بايلانىستى مۇنداي وڭىرلەرگە شىعۋدى ۋاقىتشا شەكتەۋگە مۇمكىندىك بەرەتىن زاڭنامالىق تەتىكتەر ازىرلەنەتىن بولادى»، – دەدى بەكتەنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا.
ۇكىمەت باسشىسى تاياۋ شىعىستاعى جاعداي ۋشىعىپ تۇرعان كەزدە الماتى قالاسىنان دۋباي مەن شاردجا قالالارىنا 191 قازاقستاندىقتىڭ ۇشىپ بارعانى تىركەلگەنىن حابارلادى.
ونىڭ مالىمەتىنشە، مەملەكەت باسشىسىنىڭ تاپسىرماسىمەن تاياۋ شىعىس ەلدەرىنەن قازاقستان ازاماتتارىن ەۆاكۋاتسيالاۋ بويىنشا اۋقىمدى جۇمىستار جۇرگىزىلگەن. قاقتىعىس باستالعالى بەرى 66 رەيس ۇيىمداستىرىلىپ، ونىڭ 27-ءسىنىڭ شىعىنى رەسپۋبليكالىق بيۋدجەت ەسەبىنەن تولەنگەن. ال قالعان 39 كوممەرتسيالىق رەيستىڭ بيلەتتەرىن ازاماتتار وزدەرى ساتىپ العان.
بەكتەنوۆتىڭ ايتۋىنشا، ۇكىمەت داعدارىس جاعدايلارىندا ۇلتتىق اۋە تاسىمالداۋشىلارىن جەدەل جۇمىلدىرۋ تەتىكتەرىن جەتىلدىرۋدى جانە توتەنشە جاعدايلارعا ارنالعان ارنايى اۋە كەمەلەرىن ساتىپ الۋ مۇمكىندىگىن قاراستىرىپ جاتىر.
