ەلىمىزدە “مۋزەي ءتۇنى” اكتسياسى وتەدى، دەپ حابارلايدى “ادىرنا” ۇلتتىق پورتالى.
18 مامىر – حالىقارالىق مۋزەيلەر كۇنىنە وراي قازاقستاندا ءداستۇرلى «مۋزەي ءتۇنى» اكتسياسى وتپەك. وسىعان بايلانىستى ەل تۇرعىندارى مۋزەيلەرگە تۇنگى ۋاقىتتا تەگىن كىرە الادى.
مادەنيەت مينيسترلىگىنىڭ مالىمەتىنشە، اكتسيا اياسىندا ەلىمىزدىڭ بارلىق وڭىرىندەگى مۋزەيلەر ارنايى باعدارلامالار دايىنداعان. كەلۋشىلەر ءۇشىن تاريحي كۆەستەر، تەاترلاندىرىلعان قويىلىمدار، مۋلتيمەديالىق جوبالار، جارىق جانە دىبىس شوۋلارى ۇيىمداستىرىلادى.
مادەنيەت جانە اقپارات مينيسترلىگى حابارلاۋىنشا، قازاقستان رەسپۋبليكاسىنىڭ ۇلتتىق مۋزەيى قابىرعاسىندا سكريپكاشى نازىم مۇستافينا ونەر كورسەتەدى. كونتسەرتكە گۋمانويد روبوت پەن بيونيكالىق روبوت-يت تە قاتىسادى.
سونداي-اق اكتسيا بارىسىندا ەتنومادەني باعىتتاعى باعدارلامالار ۇسىنىلادى. قوناقتار ۇلتتىق ويىندارمەن تانىسىپ، قولونەر شەبەرلەرىنىڭ جۇمىستارىن كورىپ، ەتنواۋىل اتموسفەراسىن سەزىنە الادى. بۇدان بولەك، كيىز ۇيدەگى تۇنگى شاي ءىشۋ، جۇلدىزدى اسپاندى باقىلاۋ سەكىلدى استروتۋريزم ەلەمەنتتەرى دە قامتىلعان.
