كولىك مينيسترلىگى استانادا ەكىنشى اۋەجاي سالۋعا ارنالعان باسىم باعىتتاردىڭ ءبىرىن اتادى، دەپ حابارلايدى "ادىرنا" ۇلتتىق پورتالى.
مينيستر نۇرلان ساۋرانباەۆتىڭ ايتۋىنشا، قازىر جاڭا اۋەجاي سالۋعا ارنالعان ەكى نەگىزگى لوكاتسيا قاراستىرىلىپ جاتىر. سونىڭ ىشىندە بالقاراعاي باعىتى باسىم نۇسقا رەتىندە اتالدى.
"باسىمدىق بالقاراعاي باعىتىنا بەرىلىپ وتىر. دەگەنمەن ناقتى شەشىم تەحنيكالىق-ەكونوميكالىق نەگىزدەمە اياقتالعاننان كەيىن بەلگىلى بولادى. جۇمىس ءالى تولىق اياقتالعان جوق", — دەدى نۇرلان ساۋرانباەۆ.
سونداي-اق مينيستر جوباعا ينۆەستور تارتۋ ماسەلەسىنە دە توقتالدى. ونىڭ سوزىنشە، زاماناۋي اۋەجاي سالۋ ءۇشىن ءىرى ينۆەستيتسيا مەن تەحنولوگيالىق سەرىكتەس قاجەت.
"قازىر كەلىسسوزدەر ءجۇرىپ جاتىر. ۇلكەن اۋەجاي سالۋ ءۇشىن ءارى تەحنولوگيالىق، ءارى ينۆەستيتسيالىق سەرىكتەس كەرەك", — دەدى ول.
ءمينيستردىڭ ايتۋىنشا، جوبانى استانا قالاسىنىڭ اكىمدىگى ۇيلەستىرۋدە. قازىر اكىمدىك بىرنەشە كومپانيامەن كەلىسسوز جۇرگىزىپ جاتىر. الايدا ناقتى سەرىكتەستەر ازىرگە جاريالانعان جوق.
