استانادا ءجۇرىپ كەلە جاتقان اۆتوبۋستان قۇلاپ كەتكەن ايەل ارىز جازۋدان باس تارتتى، دەپ حابارلايدى “ادىرنا” ۇلتتىق پورتالى قازتاگقا سىلتەمە جاساي وتىرىپ.
«قكج تەكسەرۋى بارىسىندا بۇل وقيعا 25 قاڭتار كۇنى ساعات 09:00 شاماسىندا №20 باعىتتاعى قوعامدىق كولىكتە بولعانى انىقتالدى. جابىرلەنۋشى ايەل ادام پوليتسياعا ارىزدانعان. اۆتوبۋس جۇرگىزۋشىسى قارجىلاي كومەك كورسەتكەننەن كەيىن ايەل ونىڭ ەشقانداي شاعىمى جوق ەكەندىگى تۋرالى جازباشا قولحات بەردى»، - دەپ حابارلادى جەكسەنبى كۇنى قكج.
ال كومپانيا 25 قاڭتاردا جولاۋشىنىڭ اۆتوبۋستان قۇلاپ، جاراقات العانى تۋرالى اقپارات «قالالىق كولىك جۇيەلەرى» جشس ورتالىق ديسپەتچەرلىك قىزمەتىنە تۇسپەگەنىن ايتادى.
سونىمەن قاتار قكج وسى وقيعاعا قاتىستى «№1 اۆتوبۋس پاركى» جشس كوميسسياسى جول قوزعالىسى قاۋىپسىزدىگى بويىنشا كەڭەس وتكىزىپ، جۇرگىزۋشىگە قاتىستى تارتىپتىك شەشىم شىعارىلعانىن دا مالىمدەدى.
ەسكە سالا كەتەيىك، الەۋمەتتىك جەلىدە جولاۋشى ايەلدىڭ ءجۇرىپ بارا جاتقان قوعامدىق كولىكتەن قۇلاپ كەتكەنى، اۆتوبۋستىڭ توقتاماي ءجۇرىپ بارا جاتقانى بەينەلەنگەن ۆيدەو تاراعان بولاتىن. كەيىننەن ايەل ادامنىڭ زارداپ شەكپەگەنى انىقتالىپ، ال جۇرگىزۋشى جاۋاپكەرشىلىككە تارتىلعانى ايتىلدى.
“ادىرنا” ۇلتتىق پورتالى
