قازاقستان ۇلتتىق بەدەلدىڭ جاھاندىق يندەكسىندە ورتالىق ازيا ەلدەرى اراسىندا جەتەكشى ورىنعا يە بولدى. CEOWORLD دەرەكتەرىنە سايكەس، قازاقستاننىڭ حالىقارالىق ءيميدجى جەتكىلىكتى جوعارى دەڭگەيدە باعالانعان.
رەيتينگتە قازاقستان ورتالىق ازيا مەملەكەتتەرى اراسىندا ەڭ ۇزدىك ناتيجە كورسەتىپ، 69-ورىنعا جايعاستى. ال رەيتينگكە 197 مەملەكەت ەنگەن.
رەيتينگ ادىستەمەسى 10 نەگىزگى باعىت پەن 50 جەكە ينديكاتوردى تالداۋعا نەگىزدەلگەن. ولاردىڭ قاتارىندا مەملەكەتتىڭ ەكونوميكالىق الەۋەتى، باسقارۋ جۇيەسىنىڭ تيىمدىلىگى، ىشكى جانە سىرتقى ساياسات، ينۆەستيتسيالىق تارتىمدىلىق، يننوۆاتسيالار مەن تەحنولوگيالاردىڭ دامۋ دەڭگەيى جانە باسقا دا كورسەتكىشتەر بار.
قورىتىندى باعا 0-دەن 100-گە دەيىنگى شكالا بويىنشا بىرىڭعاي كورسەتكىشكە بىرىكتىرىلىپ شىعارىلعان. مۇندا 100 بالل — ەڭ جوعارى ناتيجە.
تمد ەلدەرى اراسىندا قازاقستان حالىقارالىق بەدەل دەڭگەيى بويىنشا ەكىنشى ورىن الدى. ەلدىڭ قورىتىندى كورسەتكىشى 66,62 بالدى قۇرادى.
رەيتينگتە قازاقستاننان كەيىن تمد ەلدەرى اراسىندا بەلارۋس — 89-ورىن (59,27 بالل), ارمەنيا — 93-ورىن (57,14 بالل), ازەربايجان — 101-ورىن (54,15 بالل), وزبەكستان — 134-ورىن (37,7 بالل), قىرعىزستان — 145-ورىن (34,87 بالل) جانە تاجىكستان — 160-ورىن (27,92 بالل) يەلەندى.
رەيتينگ كوشباسشىسى — سينگاپۋر بولدى.
«ەلدىڭ بەدەلى ەندى ابستراكتىلى ۇعىم ەمەس، — دەپ اتاپ ءوتتى CEOWORLD رەداكتسيالىق القاسى. — بۇل باسەكەگە قابىلەتتىلىككە، ىقپالعا جانە وركەندەۋگە اسەر ەتەتىن ولشەنەتىن ءارى ستراتەگيالىق فاكتور».
زەرتتەۋ اۆتورلارىنىڭ پىكىرىنشە، CEOWORLD-تىڭ 2026 جىلعى جاھاندىق بەدەل يندەكسى مەملەكەتتەردى جاي عانا رەيتينگكە قويماي، حالىقارالىق ىقپال قاعيداتتارىنىڭ قالاي وزگەرىپ جاتقانىن دا كورسەتەدى.
قازىرگى الەمدە سەنىم، باسقارۋ ساپاسى، يننوۆاتسيالىق دامۋ جانە ەلدىڭ سىرتقى سەرىكتەستەرمەن تۇراقتى قارىم-قاتىناس ورناتا الۋ قابىلەتى بارعان سايىن ماڭىزدى بولا تۇسۋدە. اۆتورلاردىڭ ايتۋىنشا، ەتيكا، يننوۆاتسيا جانە ادامعا باعدارلانعان ۇستانىمدى ۇيلەستىرە العان مەملەكەتتەر بولاشاقتى ايقىندايتىن بولادى.
