رەسپۋبليكالىق ماڭىزى بار «ورال–اتىراۋ» تاسجولىنىڭ جالپى ۇزىندىعى 500 شاقىرىمعا جۋىقتاسا، بقو-داعى بولىگى 303 شاقىرىمدى قۇرايدى. بيىل ءوڭىر اۋماعىندا اتالعان كۇرە جولدى ورتاشا جوندەۋ بويىنشا 3 جوبا جۇزەگە اسىرىلۋدا. وبلىس اكىمىنىڭ ورىنباسارى ميراس مۇلكاي باستاعان قۇزىرلى قۇرىلىم باسشىلارى جانە «قازاۆتوجول» ۇك» اق بقوف ديرەكتورى اسىلبەك ماردانوۆ مەردىگەرلەرمەن كەزدەسىپ، اتقارىلىپ جاتقان جۇمىستارعا زەر سالدى.
«اتىراۋ–ورال» اۆتوجولىنىڭ 189–249 شاقىرىم ۋچاسكەسىن ورتاشا جوندەۋ جۇمىستارىن «ايدانا» جشس جۇرگىزۋدە. جوبا قۇنى 8,5 ملرد تەڭگەگە جۋىقتايدى. مۇندا 20 شاقىرىم جول رەسايكلينگ ادىسىمەن رەتكە كەلتىرىلەدى. كەيىن 60 شاقىرىم جولدىڭ تومەنگى قاباتىنا ءىرى تۇيىرشىكتى، ال جوعارعى قاباتىنا ۇساق تۇيىرشىكتى اسفالتبەتون توسەلەدى. ۋچاسكەدە 4 ايالداما پاۆيلونى ورناتىلادى.
«اتىراۋ–ورال» اۆتوجولىنىڭ 372–432 شاقىرىم جانە 432–492 شاقىرىم ۋچاسكەلەرىن ورتاشا جوندەۋ بويىنشا قوس جوبانى «دسك پريوريتەت» جشس جۇزەگە اسىرۋدا. مۇندا ەسكى جولدىڭ 29 شاقىرىم بولىگى رەسايكلينگ ادىسىمەن قايتا وڭدەلەدى. 120 شاقىرىم جول قاباتتارىنا ءىرى جانە ۇساق تۇيىرشىكتى اسفالتبەتون توسەلەدى. 18 ايالداما پاۆيلونى ورناتىلادى.
بيىل رەسپۋبليكالىق ماڭىزى بار «چاپاەۆ–جالپاقتال–كازتالوۆكا–رف شەكاراسى» اۆتوجولىنىڭ 0–17 شاقىرىم ۋچاسكەسى دە جوندەلىپ جاتىر. 2,7 ملرد تەڭگەنىڭ جوباسىن «توبي» جشس جۇزەگە اسىرادى. 16,5 شاقىرىم جولعا رەسايكلينگ جاسالادى. ۋچاسكەگە ءىرى تۇيىرشىكتى جانە بەرىكتىگى جوعارى ارنايى اسفالتبەتون توسەلىپ، 1 اۆتوماتتى ولشەۋ جۇيەسى ورناتىلادى.
«توبي» كومپانياسى «اقتوبە–ورال–رف شەكاراسى» اۆتوجولىنىڭ 369–408 شاقىرىم ۋچاسكەسىن دە جوندەپ جاتىر. مۇندا 26 شاقىرىم جول رەسايكلينگ ادىسىمەن قايتا وڭدەلەدى. 39 شاقىرىمعا بەرىكتىگى جوعارى اسفالتبەتون توسەلىپ، شىدەرتى مەن ولەڭتى وزەندەرىندەگى كوپىرلەردىڭ دەفورماتسيالىق جىكتەرى اۋىستىرىلادى. ۋچاسكەدە 4 ايالداما پاۆيلونى ورناتىلادى.
اتالعان 5 جوبانىڭ ناتيجەسىندە جالپى ۇزىندىعى 236 شاقىرىم كۇرە جولدار ورتاشا جوندەۋدەن وتەدى. بارلىق نىساندا جول قاۋىپسىزدىگىن قامتاماسىز ەتۋ، بەلگىلەردى جاڭارتۋ، زاماناۋي ايالدامالار ورناتۋ جانە جول جيەكتەرىن نىعايتۋ سياقتى كەشەندى ءىس-شارالار قاراستىرىلعان. وبلىس اكىمىنىڭ ورىنباسارى ميراس مۇلكاي مەردىگەرلەرگە جۇمىستاردى ساپالى ءارى ۋاقىتىلى اياقتاۋدى تاپسىردى.
