فوتو: ياندەكس
2025 جىلدىڭ سوڭىندا قىتايدا شامامەن 200 رەسەيلىك اسكەري قىزمەتكەر ارنايى دايىندىقتان وتكەن. بۇل تۋرالى 19 مامىر كۇنى Reuters اگەنتتىگى ءۇش ەۋروپالىق بارلاۋ قىزمەتىنىڭ وكىلدەرىنە جانە ءوز يەلىگىندەگى قۇپيا قۇجاتتارعا سىلتەمە جاساپ جاريالادى، دەپ حابارلايدى "ادىرنا".
اگەنتتىك مالىمەتىنشە، وتكەن جىلدىڭ سوڭىندا ءتورت وقۋ-جاتتىعۋ ۇيىمداستىرىلعان. ولار قىتايدىڭ اسكەري اكادەميالارىندا، سونىڭ ىشىندە بەيجىڭ مەن نانكيندەگى وقۋ ورىندارىندا وتكەن. باعدارلاما اياسىندا ۇشقىشسىز ۇشۋ اپپاراتتارىن (بپلا) قولدانۋ، مينومەتتەر مەن بارلاۋ دروندارىن بىرلەسىپ پايدالانۋ، انتيدرون قارۋىمەن قورعانۋ، جارىلعىش زاتتاردى پايدالانۋ جانە مينالاۋ تاكتيكاسى وقىتىلعان.
وقۋدان وتكەندەردىڭ ءبىر بولىگى نۇسقاۋشى مارتەبەسىنە يە بولعان جانە العان تاجىريبەسىن ءوز بولىمشەلەرىنە جەتكىزۋى مۇمكىن ەكەنى ايتىلادى. Reuters دەرەگىنە سايكەس، دايىندىقتان كەيىن كەيبىر رەسەيلىك اسكەري قىزمەتكەرلەر اننەكسيالانعان قىرىمدا جانە زاپوروجە وبلىسىندا درون قولدانىلعان وپەراتسيالارعا قاتىسقان.
سونىمەن قاتار اگەنتتىك رەسەي اۋماعىندا جۇزدەگەن قىتايلىق اسكەري قىزمەتكەردى دايارلاۋ جوسپارلانعانىن جازادى. مالىمەتتەرگە قاراعاندا، بۇل وقىتۋ 2025 جىلدىڭ شىلدە ايىندا جاسالعان قۇپيا كەلىسىم نەگىزىندە جۇزەگە اسقان.
Reuters 2024 جىلدان بەرى قىتايلىق اسكەري قىزمەتكەرلەردىڭ رەسەيگە ساپارلارى تۋرالى اقپارات بولعانىن، الايدا رەسەيلىك ساربازداردىڭ قىتايدا دايىندىقتان ءوتۋى – جاڭا دەرەك ەكەنىن اتاپ وتەدى. اگەنتتىك بۇل مالىمەتتەر قىتايدىڭ ۋكرايناداعى سوعىسقا قاتىسۋ دەڭگەيىنە قاتىستى جاڭا سۇراقتار تۋىنداتاتىنىن جازادى.
ال قىتاي تاراپى بۇل اقپاراتتى جوققا شىعاردى. Reuters ساۋالىنا جاۋاپ بەرگەن قىتاي سىرتقى ىستەر مينيسترلىگى ەلدىڭ بەيتاراپ ۇستانىمدى ساقتايتىنىن جانە بەيبىت كەلىسسوزدەردى قولدايتىنىن مالىمدەگەن. رەسەي مەن قىتايدىڭ قورعانىس مينيسترلىكتەرى اتالعان حابارلاماعا تۇسىنىكتەمە بەرمەگەن.
