17 مامىر كۇنى الەۋمەتتىك جەلىلەردە الماتى وبلىسىندا جەڭىل موتورلى ۇشاقتىڭ ءساتسىز قونعان ءساتى تۇسىرىلگەن ۆيدەولار پايدا بولدى، دەپ حابارلايدى "ادىرنا".
كادرلاردا كۋاگەر ۇشاقتىڭ وتە تومەن بيىكتىكتە ۇشىپ جۇرگەنىن ايتىپ، كەيىن ونىڭ قونعانىن كورسەتەدى. ۆيدەو اۆتورىنىڭ سوزىنشە، اۋە كەمەسى قونعاننان كەيىن دە تولىق توقتاماي، باياۋ قوزعالىسىن جالعاستىرعان.
19 مامىر كۇنى سول پابليكتە ءدال سول جەڭىل موتورلى ۇشاق تۋرالى تاعى ءبىر ۆيدەو جاريالاندى. وندا ۇشاقتىڭ اعاشتاردىڭ اراسىندا تۇرىپ قالعانى بايقالادى.
الماتى وبلىسىنىڭ تجد مالىمەتىنشە، قۇتقارۋشىلارعا كومەك سۇراۋ بويىنشا شاقىرتۋ تۇسپەگەن. ۇشاق رەسپۋبليكالىق ورمان تۇقىمباق جانە سەلەكتسيا ورتالىعىنا تيەسىلى ەكەنى ايتىلدى.
«قازا تاپقاندار مەن زارداپ شەككەندەر جوق»، – دەدى الماتى وبلىسى تجد.
ال ورتالىقتىڭ مالىمەتىنشە، ۇشاق «ازياكونتينەنتال» كومپانياسىنا تيەسىلى. بورتتا تەك ۇشقىشتار بولعان. ۇشۋ اۋماقتى اۋەدەن تەكسەرۋ ماقساتىندا جۇرگىزىلگەن.
«ۇشاق قۇلاعان جوق، قونعاننان كەيىن ەڭىستەن سىرعىپ كەتكەن. قازىرگى ۋاقىتتا ول قونۋ ورنىندا تۇر، جاقىن ۋاقىتتا تىكۇشاقپەن كوتەرىلىپ، جوندەۋگە جىبەرىلەدى»، - دەپ حابارلادى ورتالىق وكىلدەرى.
كولىك مينيسترلىگى الماتى وبلىسىنىڭ تاۋلارىندا جەڭىل موتورلى ۇشاقپەن بولعان وقيعاعا بايلانىستى تەرگەۋ جۇرگىزىلەتىنىن ايتتى.
«قر ينۆەستيتسيالار جانە دامۋ ءمينيسترىنىڭ 2017 جىلعى 27 شىلدەدەگى №505 بۇيرىعىمەن بەكىتىلگەن اۆياتسيالىق وقيعالار مەن وقىس وقيعالاردى تەرگەۋ جانە دەرەكتەردى ۇسىنۋ قاعيدالارىنا سايكەس، تىركەۋ ءنومىرى UP-A0091 ان-2 اۋە كەمەسىمەن بولعان اۆياتسيالىق وقيعا ادام شىعىنىسىز اۆياتسيالىق وقيعا (اپات) رەتىندە جىكتەلدى جانە قازاقستان رەسپۋبليكاسى كولىك مينيسترلىگىنىڭ كولىكتەگى وقيعالار مەن وقىس وقيعالاردى تەرگەپ-تەكسەرۋ دەپارتامەنتى تاراپىنان تەرگەلۋگە جاتادى»، - دەپ حابارلايدى سارسەنبى كۇنى كولىك مينيسترلىگىنىڭ ءباسپاسوز قىزمەتى.
