الماتى وبلىسىنىڭ قاراساي اۋدانىندا اقساي وزەنىنىڭ جاعالاۋىن سۋ شايىپ كەتۋىنە بايلانىستى جەرگىلىكتى دەڭگەيدەگى توتەنشە جاعداي جاريالاندى، دەپ حابارلايدى "ادىرنا" ۇلتتىق پورتالى.
الماتى وبلىسى اكىمدىگىنىڭ مالىمەتىنشە، 2 شىلدە كۇنى ساعات 06:50 شاماسىندا قاراساي اۋدانىنىڭ جاڭاتۇرمىس اۋىلىنداعى «اقساي كارەرى» جشس اۋماعىندا اقساي وزەنىنىڭ جاعالاۋىن سۋ شايىپ، كارەردىڭ سولتۇستىك-باتىس بولىگىندە توپىراق سىرعىعان.
وقيعا ورنىنا ءتيىستى قىزمەتتەر جەدەل جىبەرىلدى. قاۋىپسىزدىك ماقساتىندا جاقىن ماڭداعى توعىز جەكە تۇرعىن ءۇيدىڭ تۇرعىندارى ۋاقىتشا قاۋىپسىز جەرگە كوشىرىلدى. قازىرگى ۋاقىتتا ماماندار اۋماقتى تەكسەرىپ، جاعدايدى تۇراقتاندىرۋعا باعىتتالعان قاجەتتى جۇمىستاردى جۇرگىزىپ جاتىر.
ينجەنەرلىك جانە قالپىنا كەلتىرۋ جۇمىستارىنا بارلىعى 19 قىزمەتكەر مەن 14 ارنايى تەحنيكا جۇمىلدىرىلعان.
اكىمدىكتىڭ حابارلاۋىنشا، تۇرعىندارعا ءتۇسىندىرۋ جۇمىستارى جۇرگىزىلىپ، ولاردىڭ قاۋىپسىزدىگىن قامتاماسىز ەتۋ بويىنشا بارلىق قاجەتتى شارالار قابىلدانۋدا.
«قالىپتاسقان جاعدايعا بايلانىستى قاراساي اۋدانىندا جەرگىلىكتى دەڭگەيدەگى توتەنشە جاعداي جاريالاندى. بۇل شەشىم قاجەتتى جۇمىستاردى جەدەل جۇرگىزىپ، ءتيىمدى ۇيلەستىرۋگە مۇمكىندىك بەرەدى. الماتى وبلىسىنىڭ قالعان اۋداندارىنداعى جاعداي تۇراقتى»، – دەلىنگەن وبلىس اكىمدىگىنىڭ حابارلاماسىندا.
ۆەدومستۆونىڭ مالىمەتىنشە، اتقارىلىپ جاتقان جۇمىستار الماتى وبلىسىنىڭ اكىمى مەن سالالىق مەملەكەتتىك ورگانداردىڭ تۇراقتى باقىلاۋىندا.
اكىمدىك تۇرعىنداردى سابىر ساقتاۋعا، ۋاكىلەتتى ورگانداردىڭ تالاپتارىن ورىنداۋعا جانە تەك رەسمي اقپارات كوزدەرىنە سەنۋگە شاقىردى.
