الماتى وبلىسى ۇزىناعاش اۋىلىنداعى زيراتتا توناۋ فاكتىلەرى جيىلەپ كەتتى. مارقۇم بولعانداردىڭ تۋىستارى قىلمىسكەرلەردى ۇستاپ، جازالاۋدى تالاپ ەتتى. بۇل تۋرالى الماتى ارناسى جاريالادى، دەپ حابارلايدى “ادىرنا” ۇلتتىق پورتالى.
اقپارات بويىنشا، بۇكىل زيراتتا ءبىر كەزدەگى ادەمى شويىن قورشاۋلاردان تەك باعانالار مەن قيراعان ىرگەتاس قالعان.
“جەرگە كىرىپ كەتەردەي بولدىم. بۇلاي ىستەگەندەرى قاي ساسقاندارى؟! مۇنى ادام ىستەمەي المايدى. بۇلار ادام ەمەس!”، – دەپ اشۋعا بۋلىقتى ۇزىناعاش اۋىلىنىڭ تۇرعىنى مارات قاراباەۆ.
مارقۇم تۋىستارى وسىندا جەرلەنگەندەردىڭ ءبىرى - زۋحرا قاراباەۆا. ول مۇندا قىزىمەن بىرگە كەلگەن. زيراتتا ايەلدىڭ اناسى جەرلەنگەن. ايەل جاعدايدى كورىپ، جاعاسىن ۇستادى. شارباقتى بۇزىپ، الىپ كەتكەن، ىرگەتاس بۇلىنگەن. ول پوليتسياعا ارىزدانىپ ۇلگەرگەن. الايدا قىلمىسكەرلەر ءالى تابىلعان جوق.
“اتا-اپامىز جەرلەنگەن مىنا شارباققا 38 جىل بولدى. مۇنداي ءبىرىنشى رەت بولىپ تۇر. بۇل قورقىنىشتى! بۇل نە دەگەن زامان بولدى، ادامدار نەگە قاتىگەز بولىپ كەتكەنىن دە تۇسىنبەيمىن. نەگە ادامدار قۇدايدان دا، توزاقتان دا قورىقپايدى؟! مۇنداي ۆانداليزممەن اينالىسۋ قورقىنىشتى عوي. زيراتتان بىردەڭەنى قالاي الىپ كەتۋگە بولادى؟!”، – دەپ پىكىر ءبىلدىردى زۋحرا قاراباەۆا.
بارلىعى 15 بەيىت تونالعان. بۇل رەتتە جەڭىل مەتالدان جاسالعان قورشاۋلار سول كۇيىندە قالىپتى. تەك شويىننان جاسالعاندارى ۇرلانعان.
مۇندا قالدىرىلعان قولعاپتار، سونداي-اق باعانانىڭ بىركەلكى كەسىلۋى شابۋىلشىلاردىڭ تولىق «قارۋلانعانىن» انىق كورسەتەدى، ويتكەنى ولار ارقايسىسىنىڭ سالماعى كەمىندە بەس كەلى بولاتىن باعانانى كوتەرگەن.
زاتتاي دەرەكتەر قىلمىستىق ءىس ماتەريالدارىنا قوسىلدى. پوليتسەيلەر كىنالىلەردى جاۋاپقا تارتۋ ءۇشىن بار كۇش-جىگەر جۇمسالاتىنىنا سەندىردى.
«بۇگىن 24 قىركۇيەكتە تۇسكەن ارىز بويىنشا قىلمىستىق ءىس قوزعالدى. جەدەل تەرگەۋ شارالارى جۇرگىزىلۋدە. بەيىتتەرى تالان-تاراجعا تۇسكەن جەرلەنگەندەردىڭ تۋىستارى وقيعا جايلى حاباردار ەتىلەدى. مۇنداي جاعدايمەن ءبىرىنشى رەت كەزدەسىپ تۇرمىن»، - دەدى جامبىل اۋداندىق پوليتسيا باسقارماسى باستىعىنىڭ ورىنباسارى جارقىن ەرشانوۆ.
وسى وقيعادان كەيىن پوليتسەيلەر مەتالل جيناۋ ورىندارىنا رەيد جۇرگىزەدى. ازىرگە بۇل ناتيجە بەرگەن جوق. قازىر زيراتتىڭ وزىندە ءتارتىپ ساقشىلارى تاۋلىك بويى كەزەكشىلىكتە تۇر.
”ادىرنا” ۇلتتىق پورتالى
