Almaty oblysy Ūzynaǧaş auylyndaǧy ziratta tonau faktılerı jiılep kettı. Marqūm bolǧandardyŋ tuystary qylmyskerlerdı ūstap, jazalaudy talap ettı. Būl turaly Almaty arnasy jariialady, dep habarlaidy “Adyrna” ūlttyq portaly.
Aqparat boiynşa, bükıl ziratta bır kezdegı ädemı şoiyn qorşaulardan tek baǧanalar men qiraǧan ırgetas qalǧan.
“Jerge kırıp keterdei boldym. Būlai ıstegenderı qai sasqandary?! Mūny adam ıstemei almaidy. Būlar adam emes!”, – dep aşuǧa bulyqty Ūzynaǧaş auylynyŋ tūrǧyny Marat Qarabaev.Marqūm tuystary osynda jerlengenderdıŋ bırı - Zuhra Qarabaeva. Ol mūnda qyzymen bırge kelgen. Ziratta äieldıŋ anasy jerlengen. Äiel jaǧdaidy körıp, jaǧasyn ūstady. Şarbaqty būzyp, alyp ketken, ırgetas bülıngen. Ol polisiiaǧa aryzdanyp ülgergen. Alaida qylmyskerler älı tabylǧan joq.
“Ata-apamyz jerlengen myna şarbaqqa 38 jyl boldy. Mūndai bırınşı ret bolyp tūr. Būl qorqynyşty! Būl ne degen zaman boldy, adamdar nege qatygez bolyp ketkenın de tüsınbeimın. Nege adamdar Qūdaidan da, tozaqtan da qoryqpaidy?! Mūndai vandalizmmen ainalysu qorqynyşty ǧoi. Zirattan bırdeŋenı qalai alyp ketuge bolady?!”, – dep pıkır bıldırdı Zuhra Qarabaeva.Barlyǧy 15 beiıt tonalǧan. Būl rette jeŋıl metaldan jasalǧan qorşaular sol küiınde qalypty. Tek şoiynnan jasalǧandary ūrlanǧan. Mūnda qaldyrylǧan qolǧaptar, sondai-aq baǧananyŋ bırkelkı kesıluı şabuylşylardyŋ tolyq «qarulanǧanyn» anyq körsetedı, öitkenı olar ärqaisysynyŋ salmaǧy kemınde bes kelı bolatyn baǧanany kötergen. Zattai derekter qylmystyq ıs materialdaryna qosyldy. Poliseiler kınälılerdı jauapqa tartu üşın bar küş-jıger jūmsalatynyna sendırdı.
«Bügın 24 qyrküiekte tüsken aryz boiynşa qylmystyq ıs qozǧaldy. Jedel tergeu şaralary jürgızılude. Beiıtterı talan-tarajǧa tüsken jerlengenderdıŋ tuystary oqiǧa jaily habardar etıledı. Mūndai jaǧdaimen bırınşı ret kezdesıp tūrmyn», - dedı Jambyl audandyq polisiia basqarmasy bastyǧynyŋ orynbasary Jarqyn Erşanov.Osy oqiǧadan keiın poliseiler metall jinau oryndaryna reid jürgızedı. Äzırge būl nätije bergen joq. Qazır zirattyŋ özınde tärtıp saqşylary täulık boiy kezekşılıkte tūr.
”Adyrna” ūlttyq portaly
Ūqsas jaŋalyqtar
