ءتۋريزمدى تورگە شىعاردىق

2214
Adyrna.kz Telegram

وسىدان بىرنەشە كۇن بۇرىن قوناەۆ شاھارىندا يگى ءبىر شارا ءوتتى. الماتى وبلىسىنىڭ ورتالىعىندا ەل مەن جاھاننىڭ جامپوز جۋرناليستەرى مەن تۋريستىك وپەراتورلارى باس قوستى. ايتۋلى شاراعا adyrna.kz ءتىلشىسى دە قاتىسىپ، ءوڭىردىڭ تۋريزم سالاسىنداعى باستامالىرانا كۋا بولدى.

الماتى وبلىسى تۋريزم باسقارماسىنىڭ ۇيىمداستىرۋىمەن وتكەن «IZ tour» جانە «Welcome to Konaev» اتتى تۋريستىك-اقپاراتتىق تۋر، «Alatau Hike» اتتى فورۋم باسقالاردان ەرەكشەلەنە ءبىلدى. وبلىس ءتۋريزمىن دامىتۋ ءارى الەۋەتىن كورسەتۋ ماقساتىندا شەتەلدىك ونىڭ ىشىندە ۇلىبريتانيا، يتاليا، ءباا جانە نيدەرلاند ەلدەرىنەن مامانداردى تارتۋ ۇلكەن جەتىستىك. جانە ولاردىڭ ءاربىرى وبلىستىڭ نەگىزگى تۋريستىك نىساندارىن ارالاپ، ءوز ۇسىنىستارىن ايتقانى كوڭىل كونشىتتى. دەمەك، دامۋ، پروگرەسس بار دەگەن ءسوز.

جاڭادان قۇرىلىپ جاتقان وبلىس ورتالىعىنىڭ يدەولوگيالىق سيپاتىن جان-جاقتى اشۋ ءۇشىن ديماش احمەتۇلىنىڭ الماتى قالاسىنداعى مۋزەيىنەن تۋر باعدارلاماسىن باستاۋ ستراتەگيالىق تۇرعىدان وتە جاقسى شەشىم ىسپەتتى. وسى ازاماتتىڭ اتى بەرىلگەن جاڭا ورتالىققا جولى تۇسكەن تۋريستەر ەڭ اۋەلى قوناەۆتىڭ كىم بولعانىن، ونىڭ قانشالىقتى مەملەكەتشىل تۇلعا رەتىندە ەل جادىندا قالعانىن تەرەڭ اڭعارۋى كەرەك. سوندىقتان دا جۋرناليستەر مەن تۋريستىك وپەراتورلار تۋر باعدارلاماسى اياسىندا ديماش احمەتۇلىنىڭ مۋزەيىنە باس سۇقتى.

قازاقستاندى وركەندەتۋگە اتسالىسقان تاريحي تۇلعانىڭ مۋزەيىندەگى ءار جابدىق تۋريستەر تانىمىن وياتىپ، قىزىعۋشىلىعىن ارتتىراتىنى ءسوزسىز. بۇل وسى تۋرعا شاقىرتۋ العان ءار ەكسپەرتتىڭ وزىنەن اق بايقالدى.

وبلىس ءتۋريزمى تۋرالى سۇبەلى وي ايتادى دەپ اتتاي قالاپ شاقىرتقان ماماندار قوناەۆ قالاسىنا بەتتەدى. جەرگىلىكتى تابيعات تاماشالارىن كورىپ، شابىتتانعاندار دا تابىلىپ جاتتى.

ەكىنشى كۇنى تاريحي جادىگەرلەر، اتاپ ايتقاندا، كسرو شاعىندا كەڭ قولدانىستا بولعان بۇيىمدار مەن رەترو-كولىكتەر كورمەسى دە ەرەكشە اسەر قالدىردى.

ال، ءتۇس اۋا ۇيىمداستىرىلعان «Alatau Hike» فورۋمىندا وبلىس ءتۋريزمىن ىلگەرىلەتۋگە باعىتتالعان تاماشا ۇسىنىستار ايتىلدى.

العاش ءسوز العان الماتى وبلىسى تۋريزم باسقارماسىنىڭ باسشىسى ايبار تالعاتۇلى الداعى ۋاقىتتا جوسپارلانىپ وتىرعان ىرگەلى جوبالار جايلى تارقاتىپ، اتقارىلعان يگى ىستەرگە توقتالىپ ءوتتى. سونداي-اق، وبلىس ءتۋريزمىنىڭ الەۋەتىن ارتتىرۋ ءۇشىن كەز كەلگەن ۇسىنىستى تىڭداپ، جاقسى شارالاردى بىرلەسىپ اتقارۋعا شاقىردى.

اتالعان فورۋمعا تۋريزم سالاسىنىڭ مايتالماندارىمەن قاتار شەتەلدىك قوناقتار قاتىستى. ولاردىڭ اراسىنان العاش ءسوز العان «Avruoa Media Group» باسشىسى ۆاتان ءوز الماتى وبلىسىنىڭ تابيعاتىنا ءتانتى بولعانىن، سونداي-اق، وسى ارقىلى ەۋروپالىقتاردى قىزىقتىرۋعا بولاتىنىن ايتىپ ءوتتى.

وزگە قوناقتار تۋريزم سالاسىنداعى ماركەتينگ، مامان دايارلاۋ، سەرۆيستىك قىزمەتتەر جايلى باياندامالار وقىپ، ولاردى ۇزدىكتەر قاتارىنا قوسۋ ءۇشىن ارنايى ۇسىنىستارىن جەتكىزدى.

كاسىبي ماماندار اراسىنداعى مۇنداي باسقوسۋلار ءبىر الماتى وبلىسىندا عانا ەمەس، ءار وڭىردە وتكىزىلۋى كەرەك. سوندا ەل ءتۋريزمى وڭ باعىتقا وزگەرەر ەدى. ءتۋريزمدى تورگە شىعارساق ۇتارىمىز دا كوپ بولماق.

پىكىرلەر