الماتى وبلىسىندا اۋىل سپورتىنىڭ ەڭ ءىرى دودالارىنىڭ ءبىرى – «اق بيداي – 2025» رەسپۋبليكالىق ويىندارى باستالدى.
سالتاناتتى اشىلۋ راسىمىنە ەلىمىزدىڭ تۇكپىر-تۇكپىرىنەن كەلگەن سپورتشىلار، باپكەرلەر جانە سپورت سۇيەر قاۋىم جينالدى. بيىلعى ويىندار ون كۇنگە سوزىلىپ، اۋىلدىق جەرلەردەن شىققان دارىندى سپورتشىلارعا ءوز مۇمكىندىكتەرىن كورسەتۋگە جول اشادى.
ۇيىمداستىرۋشىلاردىڭ ايتۋىنشا، «اق بيداي» ءتۋرنيرىنىڭ باستى ماقساتى – اۋىل جاستارى اراسىنان ۇزدىكتەردى ىرىكتەپ، ولاردىڭ كاسىبي سپورتقا جول تابۋىنا ىقپال ەتۋ. جارىس باعدارلاماسىنا 20 سپورت ءتۇرى ەنگىزىلگەن.
الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم دا قاتىسۋشىلارعا ساتتىلىك تىلەپ، اۋىل سپورتىنىڭ ەل بولاشاعى ءۇشىن ماڭىزىن اتاپ ءوتتى.
«بارشاڭىزدى رەسپۋبليكالىق VIII «اق بيداي – 2025» اۋىل سپورت ويىندارىنىڭ اشىلۋىمەن قۇتتىقتايمىن! «اق بيداي» – اۋىل سپورتىنىڭ دامۋىنا سەرپىن بەرەتىن، سالاۋاتتى ءومىر سالتىن قالىپتاستىرۋعا جول اشاتىن ەرەكشە مۇمكىندىك. بيىلعى جارىسقا ەلىمىزدىڭ بارلىق وڭىرىنەن 18 جاستان اسقان ءۇش مىڭعا جۋىق اۋىل سپورتشىسى قاتىسىپ وتىر. بۇل دودا تەك سپورتتىق شەبەرلىكتى شىڭداپ قانا قويماي، ىنتىماق پەن دوستىقتى نىعايتۋعا قىزمەت ەتەدى»، – دەدى ول.
سونىمەن قاتار ول مەملەكەت باسشىسىنىڭ بۇقارالىق سپورتتى دامىتۋعا قاتىستى تاپسىرمالارىن اتاپ ءوتىپ، الماتى وبلىسىندا جۇيەلى جۇمىستار اتقارىلىپ جاتقانىن جەتكىزدى. وڭىردە 25 مىڭنان استام سپورتشى 67 سپورت تۇرىمەن اينالىسادى. تەك بيىلدىڭ وزىندە جەرگىلىكتى سپورتشىلار حالىقارالىق جانە رەسپۋبليكالىق جارىستاردا 1336 مەدال جەڭىپ العان.
ايتا كەتەيىك، «اق بيداي – 2025» ويىندارى وڭىرلەر اراسىنداعى سپورتتىق ىنتىماقتاستىقتى نىعايتىپ، اۋىل جاستارىنىڭ سالاۋاتتى ءومىر سالتىن ۇستانۋىنا ىقپال ەتپەك.
