Almaty oblysynda auyl sportynyŋ eŋ ırı dodalarynyŋ bırı – «Aq bidai – 2025» respublikalyq oiyndary bastaldy.
Saltanatty aşylu räsımıne elımızdıŋ tükpır-tükpırınen kelgen sportşylar, bapkerler jäne sport süier qauym jinaldy. Biylǧy oiyndar on künge sozylyp, auyldyq jerlerden şyqqan daryndy sportşylarǧa öz mümkındıkterın körsetuge jol aşady.
Ūiymdastyruşylardyŋ aituynşa, «Aq bidai» turnirınıŋ basty maqsaty – auyl jastary arasynan üzdıkterdı ırıktep, olardyŋ käsıbi sportqa jol tabuyna yqpal etu. Jarys baǧdarlamasyna 20 sport türı engızılgen.
Almaty oblysy äkımınıŋ bırınşı orynbasary Nūrlan Äbdırahym da qatysuşylarǧa sättılık tılep, auyl sportynyŋ el bolaşaǧy üşın maŋyzyn atap öttı.
«Barşaŋyzdy respublikalyq VIII «Aq bidai – 2025» auyl sport oiyndarynyŋ aşyluymen qūttyqtaimyn! «Aq bidai» – auyl sportynyŋ damuyna serpın beretın, salauatty ömır saltyn qalyptastyruǧa jol aşatyn erekşe mümkındık. Biylǧy jarysqa elımızdıŋ barlyq öŋırınen 18 jastan asqan üş myŋǧa juyq auyl sportşysy qatysyp otyr. Būl doda tek sporttyq şeberlıktı şyŋdap qana qoimai, yntymaq pen dostyqty nyǧaituǧa qyzmet etedı», – dedı ol.
Sonymen qatar ol Memleket basşysynyŋ būqaralyq sportty damytuǧa qatysty tapsyrmalaryn atap ötıp, Almaty oblysynda jüielı jūmystar atqarylyp jatqanyn jetkızdı. Öŋırde 25 myŋnan astam sportşy 67 sport türımen ainalysady. Tek biyldyŋ özınde jergılıktı sportşylar halyqaralyq jäne respublikalyq jarystarda 1336 medal jeŋıp alǧan.
Aita keteiık, «Aq bidai – 2025» oiyndary öŋırler arasyndaǧy sporttyq yntymaqtastyqty nyǧaityp, auyl jastarynyŋ salauatty ömır saltyn ūstanuyna yqpal etpek.
