ورالدا ەكى كۇندە 11 جاستاعى قىز بالا جانە 15 جاستاعى ۇل بالا سۋعا باتىپ كەتتى. ەكى قايعىلى وقيعا دا شومىلۋعا ارنالماعان سۋ ايدىندارىندا بولعان. بۇل تۋرالى Nadezhda.kz باسىلىمى جازدى، دەپ حابارلايدى “ادىرنا”.
اقپاراتقا سايكەس، قايعىلى وقيعانىڭ العاشقىسى 16 مامىر كۇنى ساعات 13:00 شاماسىندا تەلەورتالىق اۋدانىندا بولعان. قۇتقارۋشىلاردىڭ مالىمەتىنشە، 11 جاسار قىز بالا شاعان وزەنىنىڭ جاعاسىندا ويناپ ءجۇرىپ، اياعى تايىپ سۋعا قۇلاعان. قاسىندا ۇلكەندەر بولماعاندىقتان، بالا سۋعا باتىپ كەتكەن. وقيعا ورنىنا تجد قىزمەتكەرلەرى جەتكەنىمەن، ىزدەستىرۋ جۇمىسى شامامەن ەكى ساعاتقا سوزىلدى سۇڭگۋىرلەر قىز بالانىڭ دەنەسىن ەكى ساعاتتان كەيىن تاۋىپ، سۋ بەتىنە شىعارا الدى.
ەكى كۇننەن كەيىن تاعى ءبىر قايعىلى جاعداي كرۋگلووزەرنوە كەنتىندە بولدى. ساعات 19:30 شاماسىندا 15 جاستاعى ءجاسوسپىرىم كوشىم وزەنىنىڭ دەمالۋعا جابدىقتالماعان جەرىندە شومىلعان. بالا سۋ استىنا كەتىپ قالعان، شامامەن ءبىر ساعاتتان كەيىن عانا قۇتقارۋشىلار دەنەسىن تاپقان.
باتىس قازاقستان وبلىسىنىڭ تجد سۋدا ادامداردىڭ قازا تابۋىنىڭ نەگىزگى سەبەپتەرى تىيىم سالىنعان ورىنداردا شومىلۋ، سۋعا ماس كۇيىندە ءتۇسۋ، جۇزە الماۋ جانە بالالاردىڭ قاراۋسىز قالۋى ەكەنىن ەسكە سالدى.
«سۋ ايدىندارىنداعى قاۋىپسىزدىك ەرەجەلەرىن بۇزۋ نەمەسە ورىنداماۋ قر اقبتك-ءنىڭ 412-بابىنا سايكەس ايىپپۇل سالۋعا اكەپ سوعادى: جەكە تۇلعالار ءۇشىن 7 اەك، نەمەسە 30 275 تەڭگە، زاڭدى تۇلعالار ءۇشىن 10 اەك، نەمەسە 43 250 تەڭگە كولەمىندە»، – دەپ حابارلادى ۆەدومستۆو.
تجد مالىمەتىنشە، جىل باسىنان بەرى اتالعان باپ بويىنشا ءتورت ادامعا ايىپپۇل سالىنعان.
