قاماۋدا وتىرعان ياكوۆ ۆورونتسوۆتى ءماجبۇرلى پسيحياتريالىق ساراپتاماعا جىبەرۋ تۋرالى سوت شەشىمى قورعاۋشىلار اراسىندا الاڭداۋشىلىق تۋعىزدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
ادۆوكات عالىم نۇرپەيىسوۆتىڭ ايتۋىنشا، تەرگەۋ سوتىنىڭ ۆورونتسوۆتى قاراعاندى وبلىسىنداعى اقتاس كەنتىندەگى پسيحياتريالىق مەكەمەگە جىبەرۋ تۋرالى قاۋلىسى وعان الدىن الا ەسكەرتىلمەي بەرىلگەن. قورعاۋشى بۇل شەشىمگە بىردەن جەكە شاعىم ءتۇسىرىپ، ءىستىڭ اپەللياتسيالىق ساتىدا قارالۋىن كۇتىپ وتىرعانىن ايتتى. ادۆوكاتتىڭ سوزىنشە، شەشىم زاڭدى كۇشىنە ەنبەيىنشە، ۆورونتسوۆتى پسيحياتريالىق اۋرۋحاناعا ەتاپپەن جىبەرۋگە بولمايدى. الايدا قورعاۋ تاراپى ونى «اقىل-ەسى دۇرىس ەمەس» دەپ تانىپ، كەيىن ءماجبۇرلى ەمدەۋگە جىبەرۋ قاۋپىنە الاڭدايدى.
عالىم نۇرپەيىسوۆ بۇعان دەيىن قورعاۋ تارابى ەرىكتى پسيحياتريالىق ساراپتامادان باس تارتقانىن جانە ونىڭ قورعاۋىنداعى ازاماتتىڭ پسيحيكالىق اۋىتقۋى بار ەكەنىن دالەلدەيتىن نەگىز جوق ەكەنىن مالىمدەدى.
الەمدىك اتى ۆلاديمير ۆورونتسوۆ بولعان بۇرىنعى ءدىن قىزمەتكەرى قازاقستاندا تۋعان. ول سوعىستىڭ العاشقى كۇندەرىنەن باستاپ رەسەي ارەكەتىن اگرەسسيا دەپ اتاپ، قازاقستاندى ۇجىمدىق قاۋىپسىزدىك تۋرالى شارت ۇيىمىنان شىعۋعا شاقىرعان.
2023 جىلى ۆورونتسوۆقا «الاۋىزدىق قوزدىرۋ» بابى بويىنشا ءىس قوزعالعان. الايدا 2025 جىلدىڭ مامىرىندا قىلمىس قۇرامى بولماعاندىقتان ءىس توقتاتىلعان. سونىمەن قاتار ول الماتىدا ماسكەۋگە باعىنبايتىن تاۋەلسىز پراۆوسلاۆ شىركەۋىن تىركەۋگە تىرىسقان. بىراق قازاقستان رەسپۋبليكاسىنىڭ ادىلەت مينيسترلىگى تىركەۋدەن بىرنەشە رەت باس تارتقان. وسىعان بايلانىستى 2026 جىلعى 10 اقپاندا ۆورونتسوۆ الماتى قالالىق ادىلەت دەپارتامەنتىنە قارسى سوتقا تالاپ ارىز بەرگەن. ال 13 اقپانعا قاراعان ءتۇنى كۇشتىك قۇرىلىم قىزمەتكەرلەرى ونىڭ پاتەرىندە ءتىنتۋ جۇرگىزىپ، ۇنتاق ءتارىزدى زاتتاردىڭ تاركىلەنگەنىن حابارلاعان. كەيىن ۆورونتسوۆ ەسىرتكى قولداندى دەگەن اكىمشىلىك ءىس بويىنشا 10 تاۋلىككە قامالعان. ال ونىڭ ءوزى ەسىرتكى زاتتارى قولدان جاسالىپ، ادەيى تاستالعانىن مالىمدەگەن. 23 اقپاندا ول قازاقستان قىلمىستىق كودەكسىنىڭ 296 جانە 302-باپتارى بويىنشا كۇدىكتى دەپ تانىلىپ، ەكى ايعا قاماۋعا الىنعان. سوت دەنساۋلىق جاعدايىنا قاتىستى دالەلدەرگە قاراماستان، ۇيقاماق نەمەسە كەپىلمەن بوساتۋ تۋرالى ءوتىنىشتى قاناعاتتاندىرماعان.
قۇقىق قورعاۋشىلار بۇل ءىستى ساياسي جانە ءدىني قۋدالاۋدىڭ بەلگىسى رەتىندە باعالاپ وتىر. ال قازاقستان ميتروپوليالىق وكرۋگى ۆورونتسوۆتىڭ تاۋەلسىز شىركەۋ قۇرۋ ارەكەتىن «جىكشىلدىك» دەپ اتاعان.
2026 جىلدىڭ ناۋرىزىندا ياكوۆ ۆورونتسوۆ اقش-تىڭ حالىقارالىق ءدىني بوستاندىق جونىندەگى كوميسسياسى جۇرگىزەتىن سەنىمى ءۇشىن قۋدالانعان تۇلعالار بازاسىنا ەنگىزىلگەن.
قورعاۋشىلار مەن قۇقىق قورعاۋشىلار ءماجبۇرلى پسيحياتريالىق ساراپتاما شەشىمىن قىسىم كورسەتۋ قۇرالى رەتىندە باعالاپ، بۇل جاعداي ساياسي سيپاتتاعى ىستەردە پسيحياتريانى پايدالانۋ تاجىريبەسىن ەسكە سالاتىنىن ايتۋدا.
