فوتو: tiketon
اقتوبەدە تاحاۋي احتانوۆ اتىنداعى دراما تەاترعا جاڭا عيمارات سالىپ بەرۋ ءۇشىن ۇكىمەت رەزەرۆتەن 8 ملرد تەڭگە ءبولدى. بۇل تۋرالى ۇكىمەتتىڭ ءباسپاسوز قىزمەتى جاريالادى، دەپ حابارلايدى "ادىرنا".
مالىمەت بويىنشا، بۇل تىكەلەي پرەزيدەنتتىڭ تاپسىرماسى.
«پرەزيدەنت قاسىم-جومارت توقاەۆتىڭ اقتوبە قالاسىندا تاحاۋي احتانوۆ اتىنداعى دراما تەاترى ءۇشىن جاڭا عيمارات سالۋ جونىندەگى تاپسىرماسىن ورىنداۋ ءۇشىن ۇكىمەت رەزەرۆتەن 8 ملرد تەڭگە ءبولدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى»، - دەپ حابارلايدى ۇكىمەتتىڭ ءباسپاسوز قىزمەتى.
ايتا كەتەيىك، تاحاۋي احتانوۆ اتىنداعى بۇل تەاتردىڭ 80 جىلدىق تاريحى بار.
«تەاتردىڭ جاڭا عيماراتى التىن وردا شاعىن اۋدانىندا سالىنىپ جاتىر، 700 ورىنعا ەسەپتەلگەن تەاتر ونەردىڭ زاماناۋي تالاپتارىنا ساي ۇلكەن جانە كىشى زالداردان، زاماناۋي رەپەتيتسيالىق ءۇي-جايلار مەن ساحنالىق كەڭىستىكتەردەن تۇرادى. تەاتردىڭ اينالاسىندا دەمالىس ورتالىقتارى، ساياباق پەن قالا تۇرعىندارىنىڭ دەمالۋىنا ارنالعان ستاديون سالۋ كوزدەلگەن»، - دەپ حابارلايدى ۇكىمەت.
جالپى، ۇكىمەت جازعانداي، جوبا تەاتر قىزمەتتەرىنىڭ ساپاسىن ارتتىرۋعا، شىعارماشىلىق ۇجىمداردىڭ جۇمىسى ءۇشىن زاماناۋي جاعداي قالىپتاستىرۋعا جانە تەاتر ونەرىن ودان ءارى دامىتۋعا ىقپال ەتپەك.
