فوتو:instagram.com/serikuly__appaz/
استانادا بلوگەرلەر پوليتسەيدىڭ ارەكەتىن ۆيدەوعا ءتۇسىرۋ ماقساتىندا سۋعا باتىپ بارا جاتقان ادامنىڭ كەيىپىن كورسەتىپ، پرانك جاساعان. كەيىن بۇل وقيعا شاۋرما جارناماسى ءۇشىن ەكەنى انىقتالدى، دەپ حابارلايدى "ادىرنا".
بلوگەر اپپاز سەرىكۇلى الەۋمەتتىك جەلىدە جاريالاعان ۆيدەودا ادامدار پوليتسيا قىزمەتكەرىن سۋعا باتىپ بارا جاتقان ادامعا كومەكتەسۋگە شاقىرادى. وقيعا ورنىنا جەدەل جەتكەن پوليتسەي سۋعا ءتۇسىپ، “زارداپ شەككەن ادامدى” جاعاعا الىپ شىعادى.
الايدا كەيىن بۇل جاعداي الەۋمەتتىك تاجىريبە رەتىندە ۇيىمداستىرىلعانى، ال “جابىرلەنۋشىنىڭ” ءرولىن كاسىبي جۇزگىش ورىنداعانى بەلگىلى بولدى. ۆيدەو تاماقتانۋ ورنىمەن بىرلەسكەن جارناما رەتىندە جاريالانعان.
استانا قالالىق پوليتسيا دەپارتامەنتىنىڭ مالىمەتىنشە، وقيعا گرەبنوي كانال اۋماعىندا بولعان.
“ازامات قۇقىق قورعاۋ قىزمەتكەرىن "سىناۋ" ماقساتىندا سۋعا باتۋ جاعدايىن پرانك رەتىندە ۇيىمداستىرعان. بۇل شىنايى وقيعا ەمەس”، – دەلىنگەن رەسمي حابارلامادا.
پوليتسيا مۇنداي ارەكەتتەردىڭ قوعامدىق ءتارتىپتى بۇزاتىنىن ەسكەرتىپ، قۇقىق قورعاۋ ورگاندارىنىڭ جۇمىسىن ادەيى جاڭىلىستىرۋعا بولمايتىنىن ايتتى.
سوت شەشىمىمەن اتالعان ىسكە قاتىسقاندار ۇساق بۇزاقىلىق بابى بويىنشا 10 جانە 15 تاۋلىككە قاماۋعا الىندى.
قۇزىرلى ورگان ازاماتتاردى قوعامدىق ءتارتىپتى ساقتاۋعا جانە توتەنشە قىزمەتتەردىڭ جۇمىسىن قۇرمەتتەۋگە شاقىردى.
