قاراعاندىلىقتار قۇربان ايت قارساڭىندا قۇرباندىققا شالىناتىن مال باعاسىنىڭ كۇرت وسۋىنە الاڭداۋشىلىق بىلدىرۋدە، دەپ حابارلايدى "ادىرنا" ۇلتتىق پورتالى NewTimes.kz-كە سىلتەپ.
الەۋمەتتىك جەلى مەن مەسسەندجەرلەردە ايماقتاعى مال بازارلارىنداعى باعانىڭ شارىقتاپ كەتكەنى قىزۋ تالقىلانىپ جاتىر. «ۆەچەرنيايا كاراگاندا» Telegram-ارناسىنىڭ مالىمەتىنشە، كەيبىر قويلاردىڭ باعاسى 175 مىڭ تەڭگەگە دەيىن جەتكەن.
«قۇربان ايت قارساڭىندا قوي باعاسى رەكورد جاڭارتتى. ءبىر باستىڭ قۇنى 100 مىڭ تەڭگەدەن باستالادى. ال ەڭ جوعارى باعا ءتىپتى شەكتەن اسىپ كەتتى»، – دەيدى جەرگىلىكتى تۇرعىنداردىڭ ءبىرى. تۇرعىنداردىڭ ايتۋىنشا، قازىر شاعىن توقتىنىڭ ءوزى 80–100 مىڭ تەڭگەدەن ساتىلىپ جاتىر. ال ءىرى ءارى سەمىز مال ءۇشىن ساتۋشىلار 150–175 مىڭ تەڭگە سۇرايدى.
ساراپشىلار مۇنداي قىمباتتاۋدى مەرەكە الدىنداعى سۇرانىستىڭ ارتۋىمەن جانە الىپساتارلاردىڭ بەلسەندىلىگىمەن بايلانىستىرادى.
ەسكە سالساق، 2026 جىلى قۇربان ايتتىڭ العاشقى كۇنى 27 مامىرعا، سارسەنبىگە سايكەس كەلەدى.
