قاراعاندى 2028 جىلعى تمد-نىڭ جاستار استاناسى بولىپ جاريالاندى، دەپ حابارلايدى "ادىرنا" ۇلتتىق پورتالى.
بۇل تۋرالى قاراعاندى وبلىسىنىڭ اكىمى ەرماعانبەت بولەكپاەۆ مالىمدەدى.
اكىمنىڭ سوزىنشە، تمد ۇكىمەت باسشىلارى كەڭەسىنىڭ بۇل شەشىمى قازاقستاننىڭ حالىقارالىق گۋمانيتارلىق ىنتىماقتاستىقتى دامىتۋداعى بەدەلىن جانە جاستاردى قولداۋعا باعىتتالعان مەملەكەتتىك ساياساتتىڭ ناتيجەسىن كورسەتەدى.
ءوڭىر باسشىسى بۇگىندە قاراعاندى وبلىسىندا 303 مىڭنان استام جاس ءومىر سۇرەتىنىن اتاپ ءوتتى. ونىڭ سوزىنشە، جاستار ۆولونتەرلىك، عىلىم، ءبىلىم، كاسىپكەرلىك جانە قوعامدىق باستامالاردى دامىتۋعا بەلسەندى ۇلەس قوسىپ كەلەدى.
"تمد-نىڭ جاستار استاناسى مارتەبەسى قاراعاندى ءۇشىن حالىقارالىق جاستار ىنتىماقتاستىعىن كەڭەيتۋگە، تاجىريبە الماسۋعا جانە اۋقىمدى جوبالاردى جۇزەگە اسىرۋعا جاڭا مۇمكىندىك بەرەدى", — دەدى ەرماعانبەت بولەكپاەۆ.
اكىمنىڭ ايتۋىنشا، ءوڭىر حالىقارالىق دەڭگەيدەگى جوبانى جوعارى دارەجەدە ۇيىمداستىرۋعا دايىن.
