ۆاشينگتوندا بەلگىسىز ەر ادام اق ءۇي اۋماعى ماڭىندا اتىس شىعاردى، دەپ حابارلايدى «ادىرنا» ءتىلشىسى DW-گە سىلتەمە جاساپ.
23 مامىر كۇنى كەشكى ۋاقىتتا ەر ادام اق ءۇي قورشاۋىنا جاقىنداپ كەلىپ، سومكەسىنەن بەلگىسىز قارۋدى شىعارىپ، قۇپيا قىزمەت قىزمەتكەرلەرىنە وق اتقان. قارۋلى ادام جاۋاپ وقتان جارالانىپ، اۋرۋحاناعا جەتكىزىلگەن. كەيىن ونىڭ سول جەردە قايتىس بولعانى بەلگىلى بولعان.
شابۋىل جاساعان ادامنىڭ جەكە باسى تۋرالى اقپارات رەسمي مالىمدەمەدە كورسەتىلمەگەن. ۆەدومستۆو تەرگەۋ جۇرگىزىلىپ جاتقانىن جانە قوسىمشا مالىمەتتەر «قولجەتىمدى بولعان كەزدە» جاريالاناتىنىن حابارلادى.
اتىس كەزىندە كەزدەيسوق ءوتىپ بارا جاتقان ءبىر ازامات تا جارالانعان. ونىڭ جاعدايى تۋرالى اقپارات بەرىلمەگەن. ال قۇپيا قىزمەت قىزمەتكەرلەرىنىڭ ەشقايسىسى زارداپ شەكپەگەن.
اتىس دىبىستارى امەريكالىق ABC تەلەارناسىنىڭ ەفيرىنە ءتۇسىپ قالعان. جۋرناليست سەلينا ۆان اق ءۇي اۋماعىنان رەپورتاج ءتۇسىرىپ جاتقان كەزدە بىرنەشە رەت وق اتىلعانىن ەستىگەنىن ايتقان. وسىدان كەيىن جۋرناليستەرگە عيمارات ىشىنە جاسىرىنۋعا بۇيرىق بەرىلگەن.
اقش پرەزيدەنتى دونالد ترامپ وقيعا كەزىندە اق ۇيدە بولعان. بۇل وقيعا ونىڭ جۇمىسىنا اسەر ەتپەگەن. قۇپيا قىزمەت مالىمەتىنشە، ول جاعدايدان حاباردار ەتىلگەن. الايدا مۇنداي جاعدايلارعا الەۋمەتتىك جەلىدە پىكىر بىلدىرەتىن ترامپ بۇل جولى ەشقانداي جازبا جاريالاماعان. وقيعادان بۇرىن ونىڭ سوڭعى جازباسى يرانمەن سوعىستىڭ جاقىن ارادا اياقتالۋى مۇمكىن ەكەنى تۋرالى بولسا، شامامەن بەس ساعاتتان كەيىن ول اقش دەموكراتيالىق پارتياسىن سىنعا العان پوست جاريالاعان.
اق ءۇي ماڭىندا وق اتقان ەر ادامنىڭ ءموتيۆى ءالى بەلگىسىز. دەگەنمەن، بۇل 2024 جىلدان بەرى ترامپ پەن ونىڭ اكىمشىلىگىنە جاسالعان نەمەسە جوسپارلانعان شابۋىلداردىڭ ءتورتىنشى جاعدايى ەكەنى ايتىلدى.
