الماتىدا دۇنيەجۇزى قازاقتارىنىڭ قاۋىمداستىعىنىڭ فيليالىندا قانداستاردىڭ وزەكتى تۇيتكىلدەرىنە ارنالعان كەڭەيتىلگەن كەزدەسۋ ءوتتى. 2026 جىلعى 23 مامىردا وتكەن جيىندا «قانداستارعا قامقورلىق، مەملەكەتتىك قولداۋ جانە وزەكتى ماسەلەلەر» تاقىرىبى تالقىلانىپ، ازاماتتىق الۋ مەن قۇجات راسىمدەۋدەگى كۇردەلى ماسەلەلەر كۇن تارتىبىنە شىقتى.
كەزدەسۋگە قازاقستان رەسپۋبليكاسى ءماجىلىسىنىڭ دەپۋتاتى قازىبەك يسا، الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى جاۋباسوۆ باۋىرجان جاناتۇلى، الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى جازىلتاەۆا جانار قۇدايبەرگەنقىزى، كوشى-قون جۇيەلەرى ءبولىمىنىڭ باسشىسى ابىلاي تولەگەنوۆ،الماتى قالاسى پوليتسيا دەپارتامەنتى كوشى-قون قىزمەتى باسقارماسىنىڭ وكىلى ايگۇل وسپانقىزى، سونداي-اق الماتى قالاسى ىشكى ساياسات باسقارماسىنىڭ وكىلدەرى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ وكىلى نۇرلىحان ماجيقىزى قاتىستى.
جيىندا پيلوتتىق جوبا اياسىندا ازاماتتىق الۋ راسىمدەرىندەگى تۇيتكىلدەر، وڭىرلىك تىركەۋگە بايلانىستى شەكتەۋلەر جانە قۇجات تاپسىرۋداعى قيىندىقتار اشىق ايتىلدى. قاتىسۋشىلاردىڭ پىكىرىنشە، كەيبىر تالاپتار قانداستاردىڭ ازاماتتىق الۋ پروتسەسىن ەداۋىر كۇردەلەندىرىپ وتىر.
جيىندى دۇنيەجۇزى قازاقتارىنىڭ قاۋىمداستىعى-نىڭ الماتى فيليالىنىڭ باسشىسى مۇراتحان شوقان جۇرگىزدى. ول الماتىعا قونىستانعان قانداستارعا قاتىستى ماسەلەلەر بويىنشا قالا اكىمى دارحان ساتىبالدىنىڭ قابىلداۋىندا بولعانىن، سونداي-اق AMANAT پارتياسى الماتى قالالىق فيليالى دەڭگەيىندە وتكەن قابىلداۋلاردا كوتەرىلگەن ماسەلەلەردىڭ اكىمدىك تاراپىنان نازارعا الىنعانىن جانە الماتى قالاسىنىڭ ىشكى ساياسات باسقارماسىمەن جانە وزگە دە ءتيىستى مەملەكەتتىك ورگاندارمەن بىرلەسىپ جۇمىس جۇرگىزىلىپ جاتقانىن اتاپ ءوتتى.
سونداي-اق جيىندا دۇنيەجۇزى قازاقتارىنىڭ قاۋىمداستىعى الماتى فيليالى باسشىسىنىڭ ورىنباسارلارى ۆياچەسلاۆ ۆاۆيلين، قانات يسلام جانە ەربول بايورىنۇلى پىكىر ءبىلدىرىپ، ازاماتتىق ماسەلەلەرىندەگى تۇيتكىلدەردى شەشۋ قاجەتتىگىن جەتكىزدى.
كەزدەسۋدە ەرەكشە نازار تەستىلەۋ جۇيەسىنە اۋدى. باسقا الىپبيدە ءبىلىم العان قانداستار ءۇشىن ەمتيحان تاپسىرۋ مەن بالل جيناۋ تالاپتارىنىڭ قيىندىعى ايتىلدى. سونداي-اق قىتايدان كەلگەن ازاماتتار ءۇشىن جۇرگىزۋشى كۋالىگىن اۋىستىرۋ، ۆيزامەن جۇمىس ىستەۋ سياقتى اكىمشىلىك كەدەرگىلەر دە كوتەرىلدى.
سونىمەن قاتار، پيلوتتىق جوبا تالاپتارى كەي جاعدايلاردا وتباسىلاردىڭ ءبولىنىپ قالۋىنا سەبەپ بولۋدا: ءبىر مۇشەسى ەرتە كەلىپ الماتىدان ءۇي الىپ، بالاسىن وقۋعا ورنالاستىرسا، كەيىن كەلگەندەرى جوبا بويىنشا باسقا وڭىرگە جىبەرىلىپ، ءبىر وتباسىنىڭ ءار جەردە ءومىر سۇرۋىنە اكەلىپ وتىر.
جيىندا ناقتى ومىرلىك جاعدايلار دا قوزعالدى. توسەككە تاڭىلعان بالاسىنا بايلانىستى ازاماتتىق الا الماي وتىرعان انا مەن قازاقستاندا جيىرما جىلدان بەرى تۇرىپ، ۇلىنا ازاماتتىق راسىمدەي الماي جۇرگەن جالعىزباستى انانىڭ ماسەلەلەرى قوعامداعى تۇيتكىلدەردىڭ وتكىر سيپاتىن كورسەتتى.
جيىنعا 100-دەن استام قانداس قاتىسىپ، جاۋاپتى ورگاندارعا ساۋالدارىن تىكەلەي قويدى. ءماجىلىس دەپۋتاتى قازىبەك يسانىڭ بۇل ماسەلەلەر بويىنشا پارلامەنتكە دەپۋتاتتىق ساۋال جولداعانى ايتىلىپ، قاتىسۋشىلارعا ءۇمىت سىيلادى.
سونىمەن قاتار، جيىندا دەلدالدارعا سەنبەۋ، ارانداتۋشىلىققا ەرمەۋ جانە قازاقستان زاڭناماسىن قاتاڭ ساقتاۋ قاجەتتىگى ەسكەرتىلدى.
كەزدەسۋ سوڭىندا قانداستار دەمالىس كۇنىنە قاراماستان جيىنعا بەلسەنە قاتىسىپ، ماسەلەلەرىن تىڭداعان قۇزىرلى ورگان وكىلدەرىنە العىس ءبىلدىردى.
قاتىسۋشىلار كوتەرىلگەن تۇيتكىلدەردىڭ نازاردان تىس قالمايتىنىنا سەنىم ءبىلدىرىپ، جيىننان كوتەرىڭكى كوڭىل كۇيمەن تارقاستى.
