قىرعىزستان رەسەيلىك الپينيست ناتاليا ناگوۆيتسينانىڭ ءمايىتىن ەۆاكۋاتسيالاۋعا كومەكتەسۋگە دايىن. بۇل تۋرالى ەلدىڭ توتەنشە جاعدايلار مينيسترلىگى ايتتى، دەپ حابارلايدى «ادىرنا» ءتىلشىسى.
ۆەدومستۆو مالىمەتىنشە، ىزدەستىرۋ-قۇتقارۋ وپەراتسياسىن العاشقى كۇننەن باستاپ قىرعىزستان مەن رەسەيدىڭ مەملەكەتتىك ورگاندارى، «اق-ساي ترەۆەل» تۋريستىك كومپانياسى، سونداي-اق حالىقارالىق الپينيستەر مەن قۇتقارۋشىلار توپتارى بىرلەسىپ ۇيلەستىرىپ كەلەدى. جۇمىسقا اۆياتسيا، ۇشقىشسىز ۇشۋ اپپاراتتارى جانە كاسىبي بيىك تاۋلى قۇتقارۋشىلار تارتىلعان.
«جەڭىس شىڭى اۋدانىنان ءمايىتتى ەۆاكۋاتسيالاۋ ماسەلەسى شىنىمەن تالقىلانىپ جاتىر. الايدا بۇگىنگى كۇنگە دەيىن مۇنداي وپەراتسيانى وتكىزۋ تۋرالى رەسمي شەشىم قابىلدانعان جوق. بۇل ايماقتاعى كەز كەلگەن بيىك تاۋلى ىزدەستىرۋ-ەۆاكۋاتسيالىق جۇمىستار اۋا رايىنا، قار كوشكىنى قاۋپىنىڭ دەڭگەيىنە، باعىتتاردىڭ جاعدايىنا جانە كاسىبي دايىندىقتان وتكەن الپينيستەر توبىنىڭ بولۋىنا تىكەلەي بايلانىستى»، – دەپ اتاپ ءوتتى تجم.
مينيسترلىك ءوز قۇزىرەتى شەگىندە كومەك كورسەتۋگە، سونىڭ ىشىندە ۇيلەستىرۋ قولداۋىن ۇيىمداستىرۋعا جانە قاۋىپسىزدىك ساقتالعان جاعدايدا قىرعىز رەسپۋبليكاسى قورعانىس مينيسترلىگىنىڭ اۆياتسياسىن پايدالانۋعا دايىن ەكەنىن مالىمدەدى. سونىمەن قاتار تجم جەڭىس شىڭى الەمدەگى ەڭ كۇردەلى ءارى قاۋىپتى شىڭداردىڭ ءبىرى ەكەنىن ەسكە سالدى. 7000 مەتردەن جوعارى بيىكتىكتە جۇرگىزىلەتىن كەز كەلگەن قۇتقارۋ جانە ەۆاكۋاتسيا وپەراتسيالارى قۇتقارۋشىلاردىڭ ومىرىنە وتە ۇلكەن قاۋىپ توندىرەدى.
ناتاليا ناگوۆيتسينا 2025 جىلدىڭ 12 تامىزىندا جەڭىس شىڭىنان ءتۇسۋ كەزىندە شامامەن 7200 مەتر بيىكتىكتە اياعىن سىندىرىپ العان. ونىڭ سەرىكتەسى كومەك شاقىرۋ ءۇشىن تومەن تۇسكەن، ال باسقا سپورتشىلار الپينيستكە كوتەرىلىپ بارىپ، ازىق-تۇلىك پەن گاز جەتكىزگەن. سولاردىڭ ءبىرى — يتاليالىق لۋكا سينيگيليا مي ىسىنۋىنەن قايتىس بولدى. كەيىن قۇتقارۋ جۇمىستارىنا قىرعىزستان قورعانىس مينيسترلىگىنىڭ تىكۇشاعى دا قاتىسقان، الايدا ول قاتتى قونىپ، ەكيپاج مۇشەلەرىنىڭ كەيبىرى جاراقات العان. كوپ كۇندىك ارەكەتتەرگە قاراماستان، ناگوۆيتسيناعا جەتۋ مۇمكىن بولمادى.
27 تامىزدا ءالپينيستتى قۇتقارۋ وپەراتسياسى توقتاتىلدى. ال 2 قىركۇيەكتە ناتاليا ناگوۆيتسينا قازا تاپقان دەپ تانىلدى.
