بىشكەك قالالىق سوتى قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى توراعاسى قامشىبەك تاشيەۆتى ءتورت جىلعا باس بوستاندىعىنان ايىرۋ تۋرالى ۇكىم شىعاردى، دەپ حابارلايدى "ادىرنا" ءتىلشىسى.
سونىمەن قاتار وعان ەكى جىل مەرزىمگە پروباتسيالىق باقىلاۋ بەلگىلەندى.
قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى توراعاسى قامشىبەك تاشيەۆ 10 قىركۇيەكتە بىشكەك قالالىق سوتىندا وتكەن ءجارىسسوز كەزىندە ءوز كىناسىنىڭ جوق ەكەنىن ايتتى. بۇل تۋرالى ونىڭ ادۆوكاتى يكراميدين ايتكۋلوۆ حابارلادى.
قورعاۋشىنىڭ ايتۋىنشا، تاشيەۆ سوتتىڭ ءادىل شەشىم شىعاراتىنىنا سەنەتىنىن جانە ەشقانداي قىلمىس جاساماعانىن ايتقان.
«ول ءوزىنىڭ كىناسى جوق ەكەنىن، سوتتىڭ ءادىل شەشىم شىعارۋعا ءبىر عانا مۇمكىندىگى بار ەكەنىن ايتتى. ەشقانداي قىلمىس جاساماعانىن، قازىر بولماسا دا، كەيىن مىندەتتى تۇردە اقتالاتىنىنا سەنەتىنىن جەتكىزدى»، – دەدى ادۆوكات.
بۇعان دەيىن قىرعىزستاننىڭ باس پروكۋراتۋراسى سوت شەشىمىنە شاعىم تۇسىرگەن. اپەللياتسيالىق شاعىمدى قاراۋ كەزىندە پروكۋراتۋرا ايىپتالۋشىلاردى توعىز جىلعا باس بوستاندىعىنان ايىرىپ، پروباتسيالىق باقىلاۋدى باس بوستاندىعىنان ايىرۋ جازاسىنا اۋىستىرۋدى سۇراعان.
وسى ءىس بويىنشا قىرعىزستاننىڭ بۇرىنعى باس پروكۋرورى قۇرمانقۇل زۋلۋشەۆ، جوعارى كەڭەستىڭ بۇرىنعى سپيكەرى نۇرلانبەك تۇرعىنبەكۇلى جانە باسقا دا ايىپتالۋشىلارعا قاتىستى وسىنداي ۇكىم شىعارىلعان.
24.kg مالىمەتىنشە، سوت ايىپتى قايتا سارالاپ، ءىستى «بيلىكتى كۇشپەن باسىپ الۋ» بابىنان «سايلاۋ قۇقىقتارىن جۇزەگە اسىرۋعا كەدەرگى كەلتىرۋ» بابىنا اۋىستىرعان.
بۇعان دەيىن بىشكەكتىڭ ءبىرىنشى مامىر اۋداندىق سوتى تاشيەۆ پەن باسقا دا سوتتالۋشىلاردى ءتورت جىلعا باس بوستاندىعىنان ايىرۋ تۋرالى شەشىم قابىلداپ، پروباتسيالىق باقىلاۋ مەرزىمىن ءۇش جىل دەپ بەلگىلەگەن ەدى. ۇكىمگە قورعاۋ تاراپى دا، مەملەكەتتىك ايىپتاۋشى دا شاعىم تۇسىرگەن.
پروكۋراتۋرا ءار ايىپتالۋشىعا توعىز جىل باس بوستاندىعىنان ايىرۋ جازاسىن تاعايىنداۋدى سۇراعان.
